२ महिना अघि
२0८१ पुष २३ मंगलवार
खोटाङ, पुस २३
यहाँको साकेला गाउँपालिकाले गाउँगाउँमा शिविर सञ्चालन गर्दे सामाजिक सुरक्षा भत्ता वितरण कार्य थालेको छ । बृद्धबृद्धा, अशक्त र अपाङ्गता भएका नागरिकलाई सहजरुपमा सेवा प्रदान गर्ने उदेश्यले शिविर राखेर भत्ता वितरण गर्न थालेको हो ।
चालु वर्षको त्रैमासिक भत्ता जेष्ठ तथा अशक्त नागरिकलाई भौगोलिक कठिनाईबाट बँचाउन वडा–वडामा शिविर सञ्चालन गरी वितरण गर्न थालेको गाउँपालिकाले जनाएको छ । साकेलाले विगत वर्षहरुदेखि नै शिविर राखेर भत्ता वितरण गर्ने गरे अनुसार चालु वर्षको तेस्रो त्रेमासिक भत्ता पनि शिविरमार्फत नै वितरण गर्न थालेको गाउँपालिका अध्यक्ष रविप्रकाश राईले बताए । उनका अनुसार विगत ३ वर्षदेखि नै साकेलाको भत्ता वितरण बैँकिङ प्रणालीबाट हुँदै आएको छ । त्यसका लागि शिविरमा गाउँपालिकाका कर्मचारीसँगै बैँकका प्रतिनिधिलाई पनि सहभागी गराउँने गरिएको छ ।
भत्ता वितरण गर्न गाउँपालिकाले गत आईतबारदेखि घुम्ती शिविर सञ्चालन गर्न थालेको छ । वडा नं. २ को रतन्छास्थित वडा कार्यालयमा सुरु शिविरको पहिलो दिन आईतबार १ सय ८ जना लाभग्राहीले भत्ता बुझेका छन् । उनीहरुलाई १३ लाख २१ हजार रुपैँया वितरण गरिएको गाउँपालिकाका सामाजिक सुरक्षा शाखा संयोजक डिएम चामलिङ राईले बताए ।
उनका अनुसार दोस्रो दिन सोमबार १ नं.को बाँझेच्यानडाँडास्थित वडा कार्यालयमा राखिएको शिविरबाट ७५ जना लाभान्वित भएका छन् । उनीहरुलाई ८ लाख ८२ हजार रुपैँया भत्ता वितरण गरिएको छ । चालु वर्ष दोस्रो त्रैमासिकमा साकेला गाउँपालिकाभरी १ हजार ३ सय ३३ जना भत्ताका लाभग्राही यकिन भएका छन् । उनीहरुका लागि १ करोड ३४ लाख रुपैंया निकासा आएको संयोजक चामलिङले बताएका छन् ।
आगामी २६ गतेसम्म साताव्यापी सञ्चालन गरिने शिविरको तेस्रो दिन २३ गते मङ्गलबार (आज) १ नं. वडाको डाँडागाउँस्थित चण्डेश्वरी आधारभूत विद्यालयमा भत्ता वितरण भईरहेको छ । भोलि २४ गते ३ नं. वडाको खिदिमामा, २५ गते ४ नं. वडा कार्यालय मात्तिममा शिविर राखिनेछ । अन्तिम दिन २६ गते ५ नं. वडा कार्यालय मात्तिमबिर्तामा सञ्चालन गरिने घुम्ती शिविरमार्फत भत्ता बाँडेर त्यहीँ समापन गर्ने कार्यतालिका रहेको संयोजक चामलिङले बताए ।
शिविरमा आएर भत्ता बुझ्न नसक्ने लाभग्राहीहरूले भने नेपाल एसबिआई बैँकको देशभरका जुनसुकै शाखामा गएर झिक्न मिल्नेगरी रकम निकासा गरिसकिएको बैँकका प्रतिनिधि अनिलकुमार महतोले बताए । ३ वर्षअघिदेखि नै बैँकिङ प्रणालीबाट सामाजिक सुरक्षा भत्ता वितरण गर्न थालेको गाउँपालिकाले हरेक त्रेमासिक शिरिव राखेर वितरण गर्ने गरेको छ । यसअघि प्रथम त्रैमासिक भत्ता पनि शिविर राखेरै वितरण गरेको थियो ।
शिविर गाउँगाउँमा राखेर भत्ता बाँडेकोमा बृद्धबृद्धाहरु खुसी भएका छन् । शिविर नसलाउँदा गाउँपालिका केन्द्र मानेभन्ज्याङसम्म पुगेर भत्ता लिनुपर्ने समस्या रहेको उनीहरुको भनाई छ। अहिले गाउँमै आएर भत्ता दिँदा साह्रै सजिलो भएको बृद्धबृद्धाको प्रतिक्रिया छ । ‘पहिला एकाविहानै हिडेर घण्टौँपछि गाउँपालिका पुग्नुपथ्र्याे, गाह्रो हुन्थ्यो’ एक बृद्धले भने ‘हिजोआज कर्मचारी र बैँकका स्थाफ गाउँमै आएर पैसा दिन्छन्, सजिलो छ ।’
पहिलेभन्दा अहिलेका जनप्रतिनिधि र कर्मचारी पनि मिजासिला रहेको बुद्धबृद्धाको भनाई छ । ‘जनप्रतिनिधि र कर्मचारी गाउँघरमै आउँने गर्छन्, सञ्चोविसञ्चो र हालखवर सोध्छन् । काम पनि छिटोछिटो गरि दिन्छन् ।’ बृद्धबृद्धा खुसी व्यक्त गर्छन् ।
