नेपाली सेनाको ८५ किलोमिटर पैदल यात्रा आजदेखि

२ महिना अघि

उदयपुर, पुस २१

नेपाली सेनाले आजदेखि ८५ किलोमटिर लामो पैदलयात्रा सुरु गर्दैछ । जिल्लाको पुरानो सदरमुकाम उदयपुरगढीमा अहिले १०ः०० बजे उद्घाटन हुने पैदलयात्रा त्यहाँबाट विभिन्न भूगोल पार गर्दै जिल्लाको अर्को पर्यटकीय तथा ऐतिहासिकस्थल चौदण्डीगढी पुगेर टुङ्गिने छ ।

जल्लाका ऐतिहासिक, पर्यटकीय तथा सामरिक महत्वका स्थानहरु चिनाउँदै जिल्लाबासीसँग सेनासँग सम्बन्ध सुमधुर बनाउने उदेश्यले पैदलयात्रा आयोजना गरिएको सेनाको गाईघाट बोक्सेस्थित पशुपतिप्रसाद गणले जनाएको छ । गणपति शिवप्रसाद वाग्लेका अनुसार ८५ किलोमिटर दूरीको पैदलयात्रा महाभारत श्रृङ्खला पार गर्दै २८ गते चौदण्डीगढी नगरपालिकको पर्यटकीयस्थल चौदण्डीगढी पुग्नेछ । 

यात्राको क्रममा जिल्लाको मध्येभाग हुँदै रौतामाई गाउँपालिका तथा त्रियुउगा नगरपालिकाका केही भूभाग छिचोल्दै गन्तव्य पुग्नेछ । साताव्यापी यात्रा क्रममा बाटोमा पर्ने विभिन्न गाउँबस्ती, विद्यालय र सार्वजनिकस्थलमा स्थानीयसँग भेटघाट, कुराकानी गरी आत्मीयता बढाउने योजना पनि सेनाले बनाएको छ । 

पैदलयात्रामा सहभागी हुन स्थानीयतहका नगरप्रमुख, गाउँपालिका अध्यक्ष, अन्य जनप्रतिनिधि, होटल तथा पर्यटन ब्यवसायी, साईकल यात्री तथा पत्रकारहरुलाई पनि सहभागी गराइने गणपति वाग्लेले बताए । 

इतिहासको संरक्षण र प्रवद्र्धन गर्दै भूगोलको भ्रमण तथा स्थानीयबासीसँग हिमचिम बढाउन विविध गतिबिधिसमेत गरिनेछ । जस अन्तर्गत हाजिरीजवाफ, निवन्ध लेखन, वक्तृत्वकला र कविता प्रतियोगितासमेत सञ्चालन गरिनेछ । यात्रालाई बहुआयामिक, प्रभावकारी र उपलब्धीमूलक बनाउन यस्ता अतिरिक्त क्रियाकलापहरु समावेश गरिएको गणले जनाएको छ ।
 

आईतबार यात्रा सुरु गरेर हिड्ने टोली सो दिन उदयपुरगढी ४ स्थित डुम्रेमा बास बस्ने छ भने दोस्रो दिन उदयपुरगढीकै ५ नं. वडाको ढुङग्रे (भिरगाउँ)मा बास बस्ने तालिका छ । त्यसैगरी तेस्रो दिन रौतामाई गाउँपालिका ८ पुवाँरे भञ्ज्याङमा बास बसेर हिड्ने टोली चौथो दिन रौतामाई गाउँपालिकाकै ४ को पोखरीमा बास बस्नेछ । 

पाँचौ दिन त्रियुगा नगरपालिका १४ साउनेको निपाने पुग्ने टोली छैटाँै दिन चौदण्डीगढी ८ को सिम्लेमा बास बस्ने तालिका छ । अन्तिम तथा सातौँ दिन चौदण्डीगढीकै ७ नं. वडा वीरेन्द्रबजार हुँदै १ नंं. वडाको पूर्वकै ऐतिहासिक चौदण्डीगढी पुगेर समापन गर्ने कार्यक्रम छ । टोलीले हरेक दिन ५ देखि १५ किलोमिटरसम्म दुरी यात्रा गर्ने कार्यतालिका रहेको गणपति वाग्लेले जनाएका छन् । 

चौदण्डीगढीमा समापन गर्ने क्रममा स्थानीयतहस्तरीय हाजीरी जवाफ, कविता, वक्तृत्व कला र निवन्ध लेखन प्रतियोगिताका विजयी श्रष्टाहरुलाई पुरस्कार तथा प्रमाणपत्र वितरण गरिनेछ । यात्राको समीक्षा तथा कार्यक्रममा योगदान दिनेहरुलाई सम्मान, मायाको चिनो वितरणजस्ता कार्यक्रम गर्ने गणले जनाएको छ । 

यात्राको उद्घाटनका लागि सेनालगायत सहभागीहरु सबै उदयपुरगढीमा अघिल्लो साँझ नै जम्मा भईसकेका छन् । उदयपुरगढीका प्रमुख प्रशासकीय अधिकृत चित्रप्रसाद गुरागाईका अनुसार गाउँपालिका अध्यक्ष मानबहादुर केप्छाकी मगर, प्रमुख जिल्ला अधिकारी हरिप्रसाद घिमिरेलगायत सुरक्षा प्रमुखहरु उद्घाटन कार्यक्रममा सहभागी हुनेछन् ।