३ महिना अघि
२0८१ पुष १५ सोमबार
सिद्धिपुर, पुस १५
नेपाल सरकारका उपराष्ट्रपति रामसहायप्रसाद यादव उदयपुर आएका छन् । जिल्लाको चौदण्डीगढी नगरपालिका ८ सिद्धिपुरस्थित सरस्वति मावि सावाको स्वर्ण जयन्ती उद्घाटन गर्न उपराष्ट्रपति यादव यहाँ आएका हुन् ।
स्वर्ण जयन्ती उद्घाटन गर्दै उपराष्ट्रपति यादवले आधुनिक युगसम्म आईपुग्दा पनि दुर्गम गाउँघरका बालकालिकाहरु शिक्षामा पहुँचभन्दा बाहिरै रहनु दुःखको कुरा भएको बताए । गाउँका विद्यालयहरुलाई गुणस्तरीय शिक्षाका स्तरोन्नति गरेर सक्षम, सबल र पूर्वाधारयुक्त बनाउनु पर्नेमा उनको जोड थियो ।
सहरबजारमा शिक्षाको पहुँच सहज भए पनि दुर्गममा अझै सर्वसुलभ हुन नसकेको बताउँदै उनले सबैले बराबर शिक्षामा पहुँच विस्तार गर्ने वातावरण बनाउने दायित्व सरकारको रहेको बताए । त्यसका लागि गाउँका विद्यालयहरुको स्तरोन्नति आवश्यक भएको भन्दै यसप्रति सरकारले गम्भीर ध्यान दिनुपर्ने बताए ।
शिक्षा भनेको समाज निर्माणको आधारस्तम्भ र सचेत, सशक्त र आत्मनिर्भर नागरिक बनाउँने माध्यम भएको भन्दै यादवले ज्ञान, सिप र व्यवहारिकपक्ष जान्न शिक्षा नै महत्वपूर्ण हुने बताए । उनले जीवनमा आईपर्ने सबैखाले चुनौतिहरुको सामना गर्न शिक्षाले नै सिकाउने भन्दै समाज र देशको विकास र समृद्धि पनि शिक्षा विना संभव नहुने बताए ।
छोरीचेलीलाई नेपाली समाजले शिक्षामा अलि भेदभाव गरेको प्रशंग निकाल्ने उनले एउटी छोरी महिला हुने र उनै महिला आमा पनि हुने भएकलो शिक्षित सन्तान बनाउन आमा शिक्षित हुनुपने उनले बताए । त्यसका लागि छोरीलाई पूर्ण शिक्षित बनाउनुपर्नेमा उनको जोड थियो ।
प्रतिनिधिसभा सदस्य तथा काँग्रेस केन्द्रीय सदस्य डा. नारायण खड्का र चौदण्डीगढीका पूर्व नगरप्रमुख खगेन्द्र राईलगायतको उपस्थिति रहेको कार्यक्रममा सहभागी भएका यादव सोमबारै राजधानी फर्केका छन् ।
प्रमुख जिल्ला अधिकारी हरिप्रसाद घिमिरेका अनुसार काठमाडौँदेखि हवाई मार्ग भएर विराटनगर आएका उनी कार्यक्रमस्थलसम्म जीपमा आएका थिए । कार्यक्रम सकेलगत्तै विराटनगर फर्केको सिडिओ घिमिरेले बताएका छन् ।
