३ महिना अघि
२0८१ पुष १५ सोमबार
देउरी, पुस १५
त्रियुगा नगरपालिकाले आयोजना गरेको ‘तेस्रो त्रियुगा माविस्तरीय मेयर रनिङ सिल्ड प्रतियोगिता ०८१’मा त्रियुगा नमूना माध्यमिक विद्यालय गाईघाट विजयी भएको छि । गत ११ गते सुरु भएर १४ गते सम्पन्न प्रतियोगितामा गाईघाट ११ स्वर्ण, १० काश्य र ६ रजत पदकका साथ विजयी भएको हो ।
त्रियुगा नगरपालिका ५ देउरीस्थित जनता माध्यमिक विद्यालय देउरीको खेलमैदानमा सम्पन्न प्रतियोगितामा एथ्लेटिक्ससहित विभिन्न ५ विधामा विद्यार्थीहरुलाई प्रतिस्पर्धा गराइएको थियो । त्रियुगा मावि यसअघिका दुई सँस्करणमा पनि सिल्ड चुम्न सफल भएको थियो । विगतको जितलाई निरन्तरता दिदै यो वर्ष ‘ह्याट्रिक’का साथ त्रियुुगा मावि विजयी भएको हो ।
११ स्वर्ण, ६ काश्य र १६ रजत पदक हात पार्दै प्याराडाईज स्कुल गाईघाट उपविजेता हुन सफल भएको छ । त्रियुगा ५ स्थित जनता मावि श्रीपुर तेस्रो हुनका लागि ६ स्वर्ण र २ काश्य पदक प्राप्त गर्नु परेको छ ।
‘स्वास्थ्यका लागि खेलकुद, राष्ट्रका लागि खेलकुद, खेलकुद हाम्रो शान, स्थानीय खेलाडी उत्पादनमा हाम्रो अभियान’ भन्ने नाराका साथ सम्पन्न प्रतियोगिता त्रियुगा नगरपालिकाको प्रायोजनमा, नगर शिक्षा शाखाको समन्वयमा नगर खेलकुद विकास समितिले आयोजना गरेको हो ।
प्रतियोगिता समापन गर्दै आईतबार साँझ नगरप्रमुख बसन्त बस्नेत, उपप्रमुख महेश्वरी राई र शिक्षा शाखा अधिकृत शिवकुमारी राउतले खेलाडीहरुलाई पुरस्कार तथा प्रमाणपत्र वितरण गरे । जस अनुसार प्रथम स्थान पाउने नमूना माविले नगद १५ हजार, सिल्ड, मेडल र प्रमाणपत्र प्राप्त गरेको छ ।
दोस्रो हुने प्याराडाईजलाई उपमेयर राईले १० हजार नगदसहित मेडल र प्रमाणपत्र वितरण गरिन् । नगर शिक्षा शाखा अधिकृत शिवकुमारी राउतले तेस्रो स्थान ल्याउने श्रीपुरलाई ७ हजार ५ सय नगद पुरस्कार, मेडल तथा प्रमाणपत्र प्रदान गरिन् ।
प्रतियोगितामा एथ्लेटिक्सतर्फ १ सय मिटरदेखि ५ हजार मिटरसम्मको दौडमा पुरुष, महिला खेलाडीले प्रतिस्पर्धा गरेका थिए । भलिबल र कबड्डीतर्पm पनि पुरुष महिला दुवै खेलाडीले स्पर्धा गरेका थिए । त्यसैगरी प्रतियोगितामा तेक्वान्दो र कराते पनि समावेश गरिएको थियो । ५ वटै विधामा प्रथम, दोस्रो र तेस्रो हुने खेलाडीलाई नगद पुरस्कार, मेडल र प्रमाणपत्र प्रदान गरिएको थियो ।
शिक्षा शाखा अधिकृत राउतका अनुसार प्रतियोगितामा नगरपालिकाभित्रका सामुदायिक र सँस्थागत गरी ३७ विद्यालयले भाग लिएका थिए । नगरपालिकाको नियमित खेलकुद गतिबिधि अन्तर्गत प्रतियोगिता आयोजना गरिएको अधिकृत राउतले बताएकी छिन् ।
पुरस्कार वितरण गर्दै मेयर बस्नेतले खेलकुदले युवाहरुलाई अनुशासित, आत्मनिर्भर र स्वावलम्बी बनाउन मद्धत गर्ने बताए । उनले त्रियुगाले खेलक्षेत्रलाई विशेष प्राथमिक्ता दिएर अघि बढिरहेको जानकारी दिदै विद्यार्थीलाई कितावी ज्ञानसँगै अतिरिक्त क्रियाकलामा सहभागी गराउन हरेक साताको शुक्रबारलाई ‘बुक फ्रि डे’ घोषणा गरी खेलकुद गतिबिधि गराउदै आएको बताए ।
त्यसैगरी उपमेयर राईले शारीरिक तथा मानसिक स्वास्थ्यका लागि पनि खेलकुद अपरिहार्य भएको भन्दै यसले अनुशासित र सामाजिक हुन सहयोग गर्ने बताईन् । त्रियुगाले राष्ट्रियस्तरका थुप्रै खेलाडी जन्माईसकेको भन्दै उपमेयर राईले अव अन्तराष्ट्रिय खेलाडी जन्माउन लागिरहेको बताईन् ।
