त्रियुगा मेयर रनिङ सिल्ड सुरु

३ महिना अघि

देउरी, पुस ११

त्रियुगा नगरपालिकामा ‘तेस्रो त्रियुगा अन्तरमाविस्तरीय मेयर रनिङ सिल्ड प्रतियोगिता ०८१’ बुधबारदेखि सुरु भएको छ । नगरपािलकाको प्रायोजन तथा नगर युवा तथा खेलकुद विकास समितिको आयोजनामा त्रियुगा ५ देउरीस्थित जनता माध्यमिक विद्यालयको प्राङ्गणमा प्रतियोगिता सुरु भएको हो । 

‘स्वास्थ्यका लागि खेलकुद, राष्ट्रका लागि खेलकद, खेलकुद हाम्रो शान, स्थानीय खेलाडी उत्पादनमा हाम्रो अभियान’ भन्ने नाराका साथ सुरु प्रतियोगिताको नगरप्रमुख बसन्त बस्नेत र उपप्रमुख महेश्वरी राईले संयुक्तरुपमा उद्घाटन गरे । प्रतियोगितामा नगरपालिकाभरीका सामुदायिक तथा सँस्थागत गरी ३७ विद्यालयका खेलाडीको सहभागिता रहेको छ । 

प्रतियोगितामा ५ प्रकारका खेलमा प्रतिस्पर्धा गराइने छ । महिला–पुरुष भलिबल, महिला पुरुष कबड्डी, एथलेटिक्स अन्तर्गत विभिन्न दूरीमा दौडा तथा तेक्वान्दो र कराते खेलमा प्रतिस्पर्धा गराइने छ । नगर युवा तथा खेलकुद विकास समितिका सचिव किरण कार्कीका अनुसार खेल आउँदो १४ गतेसम्म सञ्चालन हुनेछ । 

प्रतियोगिता उद्घाटन गर्दै मेयर बस्नेतले विद्यार्थीहरुलाई कितावी ज्ञानमा मात्र सीमित नगरी चौतर्फी विधामा निपुण बनाउदै सक्षम नागरिक बनाउन खेलकुदक्षेत्रप्रति ध्यान दिदै आएको बताए । हरेक साताको अन्तिम शुक्रबारका दिनलाई ‘बुक फ्री डे’ घोषणा गर्दै विद्यार्थीलाई अतिरिक्त क्रियाकलापमा अनिवार्य सहभागी गराउने योजना पनि मेयर बस्नेतले सुनाए । 

आजका हरेक बालबालिका भोलिका लागि देश र नगरका कर्णधार भएकाले विद्यार्थीलाई अतिरिक्त क्रियाकलापमा अनिवार्य सहभागी गराएर सबल र सक्षम नागरिक बनाउने योजना अनुरुप खेलकुद गतिबिधि गराउदै आएको मेयर बस्नेतको भनाई थियो । 

पुरस्कारको आकर्षणसहित हरेकवर्ष खेलकुदकेन्द्रित नगरस्तरीय मेयर रनिङ सिल्ड प्रतियोगिता आयोजना गर्ने गरेको उनको भनाई थियो । नगरपालिकाले शैक्षिकक्षेत्रमा व्यापक सुधार गरी समुन्नत, सभ्य र अगुवा नागरिक निर्माण गर्ने योजना पनि त्रियुगाले थालेको उनले बताए । 

उपप्रमुख राईले त्रियुगाले अलिहेसम्म धेरै राष्ट्रियस्तरका खेलाडी जन्माईसकेको भन्दै अव अन्तराष्ट्रियस्तरका खेलाडी जन्माउने अभियानमा लागेको बताईन् । त्यसका लागि हरेक वर्ष नगरपालिकाले खेलकुदका गतिबिधि गर्ने गरेको उनको भनाई थियो । 

खेलकुद गतिबिधिले युवा युवतिहरुलाई अनुशासित, सभ्य, स्वस्थ्य र असल बन्न प्रेरणा दिने भन्दै असल नागरिक बने नगरपालिका र सिङ्गो देश बन्ने अपेक्षा आफुहरुको रहेको उपमेयर राईको भनाई थियो । नगरपालिकाले आफ्नै स्थानीय पाठ्यक्रम निर्माण गरेर शिक्षामा सुधार थालेको पनि राईले बताईन् । त्यसका लािग गतवर्ष नै स्थानीय पाठ्यक्रम निर्माण गरेर चालु शैक्षिक वर्षदेखि लागू गरिरहेको उनले बताईन् ।