३ महिना अघि
२0८१ पुष ८ सोमबार
उदयपुर, पुस ८
सोमबार राति भक्तपुरको बालकोटमा मृत भेटिएका आचार्य बाबु–छोराको हत्याबारे खोटाङ सुरक्षा निकाय अनजान छ । जिल्ला हुलाक कार्यालय खोटाङका निमित्त प्रमुखसमेत रहेका ५६ वर्षीय कुलप्रसाद आचार्य छोरासँगै मृत भेटिएका थिए ।
पुस २ गते मात्र मन्त्रालयमा कार्यालयको काम र स्वास्थ्य चेकजाँच गर्न भनी काठमाडौँ गएका आचार्य दिक्तेल रुपाकोट मझुवागढी नगरपालिका १ दिक्तेलका स्थायी बासिन्दा हुन् । आचार्य कान्छा छोरा २२ वर्षीय प्रविणसँगै मङ्गलबार विहान मृत भेटिएको खोटाङका प्रमुख जिल्ला अधिकारी शिवकुमार कार्कीले भक्तपुर प्रहरीलाई उद्धृत गर्दै बताए । उनले आचार्य खोटाङको हुलाक कार्यालयका कर्मचारी भएको र काठमाडौँमा कोठैमा छोरासहित मृत भेटिएको भन्ने खवर आएको तर, बाँकी कुरा केही नखुलेको बताए ।
खोटाङ पत्रकार महासंघका निवर्तमान अध्यक्ष दिलिप खत्रीका अनुसार आचार्यका दुई छोरा जेठा मिलन र कान्छा प्रविण काठमाडौँमा अध्ययनरत थिए । उनीहरुको डेरा भक्तपुर सूर्यविनायक नगरपालिका २ बालकोटमा रहेको र बाबु कुलप्रसाद छोराहरुसँगै बस्दा घट्ना भएको हो । बाउ–छोराको कसैले हत्या गरेको आशङ्का गरिए पनि अहिलेसम्म वास्तविक्ता भने केही नखुलेको स्थानीयको भनाई छ ।
खोटाङका प्रहरी प्रमुख डिएसपी प्रतिक विष्टले घट्नास्थल भक्तपुर भएकाले सबै जानकारी उतैबाट प्राप्त हुने बताए । डिएसपी विष्टले घट्नास्थल आफ्नो जिल्लाभित्र नपरेकाले त्यसबारे भक्तपुर प्रहरीबाटै जानकारी लिन सकिने बताए । आफुलाई भक्तपुर प्रहरीले जिल्लाबासीको नाताले सामान्य जानकारी मात्र लिएको तर, अनुसन्धानको पाटो उतैको रहने उनले बताए ।
प्रहरी परिसर भक्तपुरका अनुसार आचार्य बाउछोराले डेरा लिएको बालकोटस्थित साढे ३ तले पक्की घरको छुट्टाछुट्टै दुईवटा कोठाभित्र बेहोस अवस्थामा रहेको खवर आएपछि गएको प्रहरी टोलीले उनीहरुलाई मृत भेटेको हो । मृत भेटिएका दुवै कोठाको बाहिरबाट भने ताला लगाइएको अवस्था रहेको पनि प्रहरीले जनाएको छ ।
