३ महिना अघि
२0८१ पुष ८ सोमबार
उदयपुर, पुस ८
चौदण्डीगढी नगरपालिकाको हडिया र देवधार जोड्ने त्रियुगा नदीमा निर्माणाधीन मोटरेबल पक्की पुलको काम बजेट अभावमा सुस्ताएको छ । काम गरेको रकम समयमा भुक्तानी नपाएका कारण पुल निर्माण कार्यले गति लिन नसकेको हो ।
त्रियुगा नगरपालिका र चौदण्डीगढी नगरको सीमास्थित देवधारमा देवधार–हडिया जोड्ने निर्माणाधीन पुलको पछिल्लो बीच महिनौँसम्म भुक्तानी नपाएले काम अघि बढाउन समस्या भईरहेको निर्माण कम्पनीले जनाएको छ ।
१ वर्षअघि सुरु पुलको काम १५ प्रतिशत सम्पन्न गरे पनि भुक्तानी भने अहिलेसम्म ५ प्रतिशत मात्र पाएको निर्माण कम्पनी प्रतिनिधि उमेश श्रेष्ठले बताए । काम गरेको पैसा समयमा भुक्तानी नपाउँदा थप काम गर्न समस्या भईरहेको गुनासो श्रेष्ठले गरेका छन् ।
पेश्की नदिए पनि सम्पन्न भएको कामको बील बेलामा भुक्तानी गरिदिए कामलाई गति दिन सहिजो हुने उनको आग्रह छ । श्रेष्ठले भने ‘तर, बील पेश गरेको महिनौँ बितिसक्दा पनि भुक्तानी नपाउँदा कसरी काम अघि बढाउनु ?’ भुक्तानी पाएमा कामलाई तत्काल गति दिने पनि उनले बताए ।
चौदण्डीगढी ९ र १० को हडिया र त्रियुगा १ को जोगीदहबासीलाई मदन भण्डारी लोकमार्गसँग सोझो यातायातले जोड्ने सो पुल ५ स्पानको छ । जसमध्ये २ वटा पिल्लर ठडिईसकेको छ भने बाँकी ५ पिल्लरका लागि आवश्यक सबै सामान तयार
छ ।
पाईल फाउण्डेशन प्रविधिको पुल ३ सय २० मिटर लम्बाई र ४ मिटर पैदल कवलसहित ११ मिटर चौडाईको हुने प्राविधिक सुपरिवेक्षणको जिम्मा पाएको पुल सेक्टर धरान, सुनसरीका इन्जिनियर रोशन देवले बताए । साईट इन्चार्जसमेत रहेका देवका अनुसार पुल समयमै निर्माण सम्पन्न गर्ने उदेश्यले अनुसार कामले गति लिन सकेको छैन । समयमा भुक्तानी नहुनु नै यसको प्रमुख कारण रहेको पनि इन्जिनियर देव बताउँछन् ।
०७९ मङ्सिर २१ गते सम्झौता भए पनि स्थलगत अध्ययन र प्राविधिक डिजाईन गर्न ९ महिना लाग्दा १ वर्षपछि मात्र निर्माण सुरु भएको हो । मूल्य अभिबृद्धि कर र पिएससहित ४० करोड ३४ लाख ८८ हजार ८ सय रुपैँयामा निर्माण सम्झौता भएको पुल ०८३ जेठ २० गतेभित्र सम्पन्न गरेर हस्तान्तरण गर्नु पर्नेछ । एम÷एस सूर्य एण्ड सन्स् प्रालि धरान सुनसरीले ठेक्का पाएको पुल बेलैमा सम्पन्न गर्ने गरी काम गर्न लगाइएको इन्जिनियर देवले बताए ।
सेक्टर कार्यालयका सूचना अधिकारी इन्जिनियर आविष्कार तिम्सीनाका अनुसार भुक्तानीमा समस्या भएकै हो । विभागबाट समयमा बजेट निकासा नहुँदा काम गरेको भुक्तानी रोकिएको उनको स्वीकारोक्ति छ । भुक्तानी रोकिएकाले सरासर काम हुन नसकेको भन्दै इन्जिनियर तिम्सीनाले आवश्यक बजेट तत्काल निकासा गर्न विभागसँग पत्राचार र मौखिक कुराकानी भईरहेको बताए । बजेट आउनेवित्तिकै भुक्तानी गरेर कामलाई तिब्रता दिइने उनले बताए ।
