३ महिना अघि
२0८१ पुष ७ आईतवार
उदयपुर, पुस ७
जिल्ला प्रहरी कार्यालय उदयपुरले लागू औषधविरुद्धको अभियानलाई तिब्र पारेको छ । प्रहरीले त्रियुगा नगरपालिकासँगको साझेदारीमा समुदाय प्रहरी साझेदारी अवधारण अनुसार लागूऔषध दुव्र्यसनविरुद्ध जनचेतना अभिवृद्धिका गतिबिधि गरिरहेको छ ।
यसै क्रममा प्रहरीले ‘लागू औषधमुक्त समाज निर्माणमा विद्यार्थीको भूमिका’ विषयमा नगरस्तरीय वक्तृत्वकला प्रतियोगिता सम्पन्न भएको छ । नगरपालिकाभित्रका माध्यमिकतहमा अध्ययनरत कक्षा ९ र १० का विद्यार्थीहरुबीच प्रतिस्पर्धा गराइएको वक्तृत्वकला प्रतियोगिताको नतिजा सार्वज्निक गरिएको छ ।
प्रतियोगितामा त्रियुगा नगरपालिकाभित्रका १३ वटा सामुदायिक तथा निजी विद्यालयका विद्यार्थीको सहभागिता थियो । जसमा क्यान्भास एकेडेमीका ९ कक्षामा अध्ययनरत छात्रा जेनिशा कार्की प्रथम भएकी छिन् । राष्ट्रिय मावि बगाहामा कक्षा १० की छात्रा नम्रता दाहाल द्वितीय हुँदा वाल मन्दिर मावि वोक्सेकी कक्षा १० की मनिषा चौधरी तृतीय भईन् ।
आईतबार जिल्ला समन्वय समितिको सभाकक्षमा आयोजित एक कार्यक्रममा विजेता विद्यार्थीलाई पुरस्कार तथा प्रमाणपत्र प्रदान गरियो । जिल्ला प्रहरी प्रमुख एसपी हरिहरनाथ योगीको अध्यक्षता, त्रियुगा नगर उपप्रमुख महेश्वरी राईको प्रमुख आतिथ्यता र प्रमुख जिल्ला अधिकारी हरिप्रसाद घिमिरेको विशेष आतिथ्यतामा कार्यक्रम सम्पन्न भएको हो ।
जिल्ला सुरक्षा समितिका पदाधिकारी, त्रियुगा नगरपालिका ११ र १२ नं. वडाध्यक्षहरुसमेत उपस्थित कार्यक्रममा विभिन्न विद्यालयका शिक्षक, सामाजिक अभियन्ता, विद्यार्थी, सञ्चारकर्मीलगायत सर्वसाधारणको उपस्थिति थियो ।
