३ महिना अघि
२0८१ पुष ७ आईतवार
उदयपुरगढी, पुस ७
उदयपुरगढीमा ‘कर्मचारी–स्थानीय मैत्रीपूर्ण फुटबल प्रतियोगिता ०८१’ शनिबार सम्पन्न भएको छ । उदयपुरगढी रङ्गशालामा सम्पन्न प्रतियोगिताको उपाधि कर्मचारी समूहले चुमेको छ ।
स्थानीय सर्वसाधारण र कर्मचारीबीच आत्मीय सम्बन्ध बढाउने उदेश्यले आयोजित प्रतियोगितामा कर्मचारी समूह ३–० गोलले ले विजयी भएको हो । प्रतियोगिताको उद्घाटन गाउँपालिका अध्यक्ष मानबहादुर केप्छाकी मगरले बल हस्तान्तरण गर्नुका साथै प्रमुख प्रशासकीय अधिकृत चित्रप्रसाद गुरागाँईले गोल हानेर गरेका थिए ।
प्रतियोगितामा कर्मचारीतर्पm उदयपुरगढी गाउँपालिकाका कर्मचारी तथा सर्वसाधारणतर्फ ३० वर्ष माथिका भेट्रान खेलाडीको सहभागिता थियो । दुवै टिमतर्फका खेलाडीले रोचक प्रतिस्पर्धा गरेका थिए ।
खेल सुरु भएको २२ औँ मिनटमा सर्वसाधारणतर्फ उमेश राईले पहिलो गोल गरेर आफ्नो टिमलाई अघि बढाएकोमा ५ मिनटपछि नै कर्मचारीतर्फका ज्योतिप्रकाश चौधरीले प्रहार गरेको किकमा अनिश रोकाले हेडिङमार्फत गोल गर्दै खेललाई बराबरी बनाए ।
मध्यान्तरपछिको खेल अवधिभर दुवैतर्फबाट गोल नभएपछि नतिजा निकाल्न टाईब्रेकरको सहारा लिनु परेको कर्मचारी टिमका क्याप्टेन शेखर कार्कीले बताए । उनका अनुसार टाईब्रेकरमा कर्मचारीतर्फ अनिश रोका, ज्योतिप्रकाश चौधरी र लक्ष्मण कार्कीको प्रहारले जाली चुम्यो ।
उता प्रतिस्पर्धी सर्वसाधारणको टिमको तर्फबाट गोल गर्ने मौका पाएका तीनैजनाको प्रहार पोष्ट प्रवेश गर्न नसक्दा कर्मचारी टिम शून्यका विरुद्ध ३ गोलले विजयी हुन पुगेको हो ।
समापन समारोहमा अध्यक्ष मगर र उपाध्यक्ष जीतबहादुर खड्काले विजेता कर्मचारी समूहलाई पुरस्कारस्वरुप ३५ किलोको खसी प्रदान गरे । पुरस्का वापत पाएको खसी भने खेल समापनपछि प्रतियोगितालाई वनभोज कार्यक्रममा परिणत रमाईलो गरिएको थियो ।
गाउँपालिका अध्यक्ष मगरले कर्मचारी र सर्वसाधारणबीचको सम्बन्ध सुमधुर राख्ने
तथा आत्मीयता बढाउने उदेश्यले फुटबल प्रतियोगिता आयोजना गरिएको बताए । उनले गाउँको विकास गर्नका लागि कर्मचारी र सर्वसाधारणबीच न्यानो सम्बन्ध आवश्यक पर्ने हुनाले यस्तो खेलकुद र वनभोज कार्यक्रम गरेको बताए ।
फुटबल र वनभोजमा खेलाडीसँगै कर्मचारी, जनप्रतिनिधि र सर्वसाधारणको सहभागिता रहेको गाउँपालिकाका लेखापाल शेखर बुढाथोकीले बताए । उनका अनुसार प्रतियोगितामा वितरित पुरस्कार (खसी) खेलाडीहरुले सङ्कलन गरेको रकमबाट खरिद गरिएको हो । कर्मचारी र सर्वसाधारण सँगै वनभोज जाने र फुटबल पनि खेल्ने सल्लाह गरेर आफुआफु रकम सङ्कलन गरेर खसी र अन्य वनभोजका सामग्री खरिद गरेको बुढाथोकीले बताए ।
