तल्लो बसाहामा पुल नबनेकोमा स्थानीय रुष्ट

३ महिना अघि

बसाहा, पुस ४

हरेक वर्षामा बाढीको कहर सहदै आएका चौदण्डीगढी नगरपालिका ४ को तल्लो बसाहास्थित सुन्दरी खोलामा निर्माणाधीन पुल वर्षौँसम्म नबबनेकोमा स्थानीयहरु रुष्ट बनेका छन् । तल्लो बसाहा पश्चिमदेखि ढलोचौरी बीचमा रहेको सु्न्ुदरीखोलामा निर्माणाधीन पक्की पुल आधादशक बित्न लाग्दासम्म सम्पन्न नभएकोमा स्थानीय आक्रोसित बनेका हुन् । 

हिउँद याममा सामान्य रहे पनि वर्षायाममा बाढी आउँदा सुन्दरी खोला खतरनाक हुने गरेको छ । वर्षायामको बाढीले स्थानीयबासीलाई वल्लो गाउँबाट र पल्लो टोल आउजाउ गर्न र विद्यार्थीलाई स्कुल जानसमेत रोक्ने गरेको छ । त्यस्तो समस्याबाट पार पाउन स्थानीयको माग अनुसार सुन्दरी खोलामा मोटरेबल पक्की पुल निर्माण थालिएको थियो । 

जनताको माग अनुसार ७ वर्षअघि निर्माण सुरु भएको पुल यतिका वर्ष बितिसक्दासम्म निर्माण सम्पन्न नभएको भन्दै स्थानीय आक्रोसित भएको अगुवा महिला मौसम राईले बताईन् । यतिका वर्ष बित्दासम्म अझै पुल नबनेको स्थानीयको गुनासो छ । ३ वषर्मा निर्माण सकेर हस्तान्तरण गर्ने सम्झौता गरेर थालिएको पुलको काम हालसम्म ७५ प्रतिशत हाराहारी मात्र सकिएको छ । 

६४ मिटर लामो ११ मिटर चौडाईको २ स्पानको ३ वर्षमा बनाईसक्ने पुल ७ वर्ष बित्दा पनि ७५ प्रतिशत मात्र काम हुनुको मुख्य कारण ठेकेदारदेखि नियमन निकायसम्मको कमजोरी भएको उनीहरुको भनाई छ । यतिका वर्ष बित्दा पनि आधाउधि मात्र काम हुनुले पुल कहिले बनिसक्ने हो कुनै टुङ्गो नभएको अर्का स्थानीय प्रशान्त राईले बताए । नियमन निकाय र ठेकेदारको लापरबाहीको सिकार भएकैले अहिलेसम्म पुल पुरा नभएको राईको भनाई छ । 

पुल बनाउने जिम्मा पाएका ठेकेदार शम्भु ठाकरको लापरबाहीका कारण पुल समयमा नसकिएको आरोप पनि स्थानीयको छ । काम छिटो गर्न पटकपटक तागेता गर्दा पनि ठाकुरले चासो नदिएको स्थानीयको आरोप छ । ठाकुरले भने चाँडै पुल बनाईसक्ने आश्वासन दिने गरेका छन् । पुल बनाउन थाल्नेवित्तिकै कोविड महामारी सुरु भएका कारण ढिला भएको उनको भनाई छ । 

एकातिर पुल निर्माण ढिला भईरहेका बेला अर्कातिर स्थानीयले पुलका लागि दिएको जमिनको मुआब्जासमेत अहिलेसम्म नपाएको गुनासो गरेका छन् । स्थानीय सरला बिष्टका अनुसार पुल बनाउनका लागि जमिन दिने ३ घरको जमिन मुआब्जा अहिलेसम्म पाएका छैनन् । पुल बन्छ भनेर नम्बरी जग्गा न्यूनतम मूल्यमा दिएको बताउँदै विष्टले तर, पुल पनि नबनेको र मुआब्जा अहिलेसम्म नपाएकोमा गुनासो गरिन् । 

समयमा पुल नबनेका कारण आउदो वर्षायाममा पनि बाढीले सताउने चिन्ताले स्थानीयलाई अहिलेदेखि नै पिरोल्न थालेको छ । यस्तै पाराले हो भने यो वर्ष पनि पुल नबने पक्का देखिएको भन्दै आउदो वर्षामा पनि बाढीको कहर खेप्न तयार भएर बस्नुपर्ने अवस्था आएको स्थानीय छबिलाल चाधैरीले चिन्ता व्यक्त गरे । सो पुल बनेमा त्यसभेगका स्थानीयबासीलाई वडा कार्यालय बसाहा र बेलटारस्थित नगरपलिका केन्द्र आउन सहज हुने छ ।