प्रदेश प्रहरी प्रमुखमा राजन अधिकारी 

३ महिना अघि

विराटनगर, पुस ३

प्रदेश प्रहरी प्रमुख राजन अधिकारीले पदभार ग्रहण गरेका छन् । नयाँ प्रदेश प्रहरी प्रमुखको रुपमा सरुवा भई आएका प्रहरी नायव महानिरीक्षक (डिआईजी) अधिकारीले बुधबार एक कार्यक्रमका बीच पदभार ग्रहण गरेका हुन् । 

गृह मन्त्रालयको मंसिर २७ गतेको निर्णय अनुसार विशेष व्यूरोबाट सरुवा भएर उनी प्रदेश प्रहरी प्रमुखको जिम्मेबारीमा आएका हुन् । डिआईजी अधिकारीलाई प्रदेश प्रहरी तालिम केन्द्रका समादेशक एसएसपी अबिनारायण काफ्ले, प्रदेश प्रहरी कार्यालयका एसएसपी भिम दाहाल तथा नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरी, विशेष सुरक्षा गण दुहवी, प्रदेश प्रहरी गण रानी, जिल्ला प्रहरी कार्यलय मोरङ र सुनसरीका प्रमुखलगायत सिनियर प्रहरी अधिकृतहरुले स्वागत गरेका थिए । 

अमर प्रहरी स्मारकमा पुष्पहार अर्पण गर्दै पदभार ग्रहण गरेका डिआईजी अधिकारीलाई प्रदेश प्रहरी कार्यालयका एसएसपी भीम दाहालले प्रदेशको बर्तमान शान्ति  सुरक्षाको अवस्था, जनशक्ति व्यवस्थापन, अपराधको बिद्यमान अवस्था र चुनौती, प्रदेश प्रहरी कार्यालयद्वारा गरिएका नविनतम तथा रचनात्मक कार्यबारेमा अवगत गराएका थिए । 

कार्यक्रममा डिआईजी अधिकारीले उपस्थित प्रहरी अधिकृत तथा जवानहरूलाई शान्ति सुरक्षा र जनतासँगको समन्वयबारे आवश्यक निर्देशन दिएका थिए । सो क्रममा अधिकारीले प्रहरीलाई मुटुको संज्ञा दिदै शरीरलाई जीवन्त राख्न जसरी मुटु बिश्राम नलिई निरन्तर चलायमान रहिरहन्छ त्यसैगरी प्रहरीले समाजको मुटुको रुपमा  जीवन्त, गतिशील र सुरक्षित रहेर अहोरात्र कर्तव्यको बलीबेदीमा आफूलाई समर्पण गर्नुपर्ने बताए । 

समाजका हरेक पक्षहरू सुरक्षाको जगमा अडेको भन्दै उनले सुरक्षा नै समाजको मेरूदण्ड भएकाले प्रहरी जनशक्ति अनवरत मुटु धड्के जस्तै आफ्नो ठाउँमा रहेर पदीय दायित्व अनुसार त्रृटिरहित कार्य सम्पादन गर्दै सामु पर्ने चुनौतीहरूलाई जित्न निर्भिक, ईमानदार र वफादार राष्ट्र सेवकको रूपमा खट्न उनको निर्देशन थियो । 

डिआईजी अधिकारीले सवारी दुर्घटना, साईबर अपराध, लागुऔषध प्रयोग र ओसारपसार, सहकारी ठगी र अन्य प्रकारका अपराधका घटनालाई नियन्त्रण र निरुत्साहित गर्न योजनाबद्धरुपमा काम गर्नुपर्ने खाँचो औँल्याए । प्रदेश प्रहरी प्रमुखको हैसियतले कुशल अभिभावकको जिम्मेवारी निर्वाह गर्ने विश्वास दिलाउदै डिआईजी अधिकारीले प्रहरी संगठनको छविलाई सदैव उच्च राखेर अपराधीलाई डर र निर्दोषलाई भरू दिने वाचा पनि गरे ।

उनले प्रहरी कर्मचारीलाई सँधै व्यवसायिक र निष्ठावान भएर नागरिकको सेवामा अहोरात्र खट्न पनि निर्देशन दिएका थिए ।