३ महिना अघि
२0८१ पुष २ मंगलवार
विराटनगर, पुस २
प्रदेश प्रहरी कार्यालय विराटनगरले लागू औषधविरुद्ध सचेतना अभियान चलाउन विभिन्न स्थानीय भाषामा श्रव्यदृष्य सामग्री निर्माण गरेको छ । १ नं. प्रदेश सरकारको सहयोगमा प्रहरीले स्थानीय समुदाय र जातजातिहरु राई, लिम्वु, मैथिली र थारु भाषामा सचेतनामूलक श्रव्यदृष्य सामग्री निर्माण गरेको हो ।
लिम्वु, मैथिली, राई र थारु भाषामा निर्माण गरिएको लागुऔषध दुर्व्यवसनविरुद्ध सचेतनामुलक श्रव्यदृश्य सामग्रीको मङ्गलबार विराटनगरमा एक कार्यक्रमका बीच अनावरण गरिएको छ । प्रदेश प्रहरी कार्यालयले विभिन्न भाषामा निर्मित श्रव्यदृष्य सामग्री सबैतिर प्रचार प्रशार गरेर समाजलाई सकारात्मक सन्देश प्रवाह गर्ने जनाएको छ ।
लागू औषध दुव्र्यसन नियन्त्रणका तथा न्यूनिकरणका लागि प्रहरीले आमाहरुसँग समन्वय र सहकार्य गरेर अघि बढ्ने जनाएको छ । समाजमा लागुऔषध दुर्व्यसन नियन्त्रणका लागि सचेतना फैलाउन सम्पुर्णमा आग्रह पनि प्रहरीले गरेको छ ।
कार्यक्रममा प्रदेश प्रहरी प्रमुख डिआईजी चन्द्रकुबेर खापुङले लागुऔषध दुर्ब्यसनीहरुलाई नियन्त्रण तथा निरुत्साहित गर्ने उद्देश्यले बिभिन्न भाषाहरुमा तयार पारिएको लागुऔषध सम्बन्धी श्रब्यदृश्य सामग्रीले अभिभावकहरुप्रति एक प्रकारको सकारात्मक छाप छोड्ने अपेक्षा गरे । उनले अभिभावकहरुलाई आफ्ना छोराछोरी लागुऔषध दुर्व्यसनीमा फसेको वा नफसेको लक्षणहरु थाहा पाउन पनि यो सामग्रीले सजिलो हुने पनि बताए ।
