३ महिना अघि
२0८१ मंसिर २४ सोमबार
उदयपुर, मङ्सिर २४
झापाको बिर्तामोडमा आउदो माघ पहिलो सातादेखि ‘बिर्तामोड अन्तर्राष्ट्रिय औद्योगिक व्यापार महोत्सव’ सुरु हुने भएको छ । बिर्तामोड उद्योग वाणिज्य सङ्घको आयोजनामा हुने महोत्सवका लागि तिब्र तयारी भईरहेको छ ।
स्थानीय घरेलु, साना, मझौला, ठूला उद्योगहरूका अतिरिक्त विदेशी बस्तु, पहाडी जिल्लाका खनिजजन्य, कृषिजन्य वस्तुहरूको प्रचार, प्रर्वद्धन र विक्री वितरण गर्ने उद्देश्यले महोत्सव आयोजना गर्न लागिएको सङ्घका अध्यक्ष राजु न्यौपानेले बताए ।
माघ ११ गतेदेखि २३ गतेसम्म आयोजना हुने महोत्सवका लागि सङ्घले उपाध्यक्ष विशाल थापाको संयोजकत्वमा मेला आयोजक मूल समारोह समितिसमेत गठन गरेर प्रचार प्रसार थालेको छ । त्यस्तै अनुगमन समिति संयोजकमा संघकी जनसम्पर्क उपाध्यक्ष गोमा भट्टराईलाई चयन गरिएको छ ।
मूल समारोह समितिले महोत्सवस्थल चयनलगायत अन्य तयारीको काम थालेको जनाएको छ । होत्सवमा नेपालका स्थानीय उत्पादनदेखि भारत, बंगलादेश र पाकिस्तानबाटसमेत वहुराष्ट्रिय कम्पनीका उत्पादनहरुको विक्री वितरण र प्रर्दशनी गर्ने स्टलहरु राखिने छ ।
त्यस्तै स्थानीय, राष्ट्रिय तथा प्रदेशका चर्चित कलाकारको दैनिक प्रस्तुति, फेशन शो, विद्यालय तथा कला केन्द्रको विविध साँस्कृतिक कार्यक्रमहरु गरेर मेलालाई आकर्षण दिइने आयोजकको भनाई छ । मेलामा विभिन्न शाहसिक तथा मनोरञ्जनात्मक खेलहरू, खाद्यान्नमा फुडकोर्ट स्टलहरु राखिने छन् भने मिडिया सेन्टर, कन्फरेन्स हल, फ्रि वाईफाइ जोन, प्राथमिक उपचार, शौचालय, खानेपानी तथा पार्किङलगायत सुरक्षा व्यवस्थासमेत गरिने छ ।
सुस्ताएको अर्थतन्त्रलाई चलायमान बनाउने उदेश्यले आयोजना गर्न लागिएको मेलालाई सफल बनाउन सबैसँग आग्रह गरेको आयोजक सङ्घका महासचिव कुशल खतिवडाले बताएका छन् ।
