शिक्षक आन्दोलनमा सघाउँने प्रचण्डको प्रतिबद्धता

३ महिना अघि

काठमाडौँ, मङ्सिर २२

नेकपा (माओवादी केन्द्र)का अध्यक्ष पुष्पकमल दाहाल (प्रचण्ड)ले विद्यालय शिक्षा विधेयक पारित गर्न सदन र सडकबाट दबाब आवश्यक रहेको बताएका छन् । एकीकृत अखिल नेपाल शिक्षक संगठनको प्रथम राष्ट्रिय परिषद तथा शिक्षक समाज नेपालको एकता घोषणा कार्यक्रममा शनिबार बोल्दै अध्यक्ष प्रचण्डले यस्तो प्रतिबद्धता जनाएका हुन् । 

अध्यक्ष प्रचण्डले शिक्षा विधेयक पारित गर्न सदनबाट आफ्नो पार्टीले दबाब दिने बताउँदै त्यसका लागि शिक्षकहरूले पनि सडकबाट दबाब दिनुपर्ने बताए । अध्यक्ष प्रचण्डले शिक्षकहरूलाई सडक आन्दोलनका लागि तयार रहन आग्रह गर्दै सडक आन्दोलनलाई पार्टीको पूर्ण समर्थनका साथ आफू सहभागी हुनेसमेत प्रतिवद्धता जनाए ।
्

आफू नेतृत्वको सरकारले शिक्षा विधेयक संसदमा दर्ता गरेर पारित गर्ने प्रयास गर्दागर्दै सरकार ढलेको भन्दै प्रचण्डले शिक्षक कर्मचारीको अधिकार प्राप्तिका लागि शिक्षा विधेयक संसदबाट पारित हुनुपर्नेमा जोड दिए । शिक्षा विधेयक पारित गर्न सदनमा छलफल र सडकमा आन्दोलन चर्काउनुपर्नेमा उनको जोड थियो ।

 
शिक्षा नसुध्रिएसम्म देश नसुध्रने र शिक्षा सुध्रन शिक्षा विधेयक संसदबाट पारित हुनु पर्ने प्रचण्डको भनाई थियो । ‘शिक्षा विधेयकको पक्षमा हुने शिक्षकका जुनसुकै आन्दोलनलाई हामी सघाउँछौँ’ अध्यक्ष प्रचण्डले भने ‘त्यसका लागि विद्यालय कर्मचारी, इसिडी, राहत, करारलगायत सबैखाले शिक्षाका मुद्दा सम्बोधन गर्न शिक्षा ऐन् चाहिन्छ । त्यसका लागि हामी सबैजना दबावमूलक कार्यक्रममा लाग्नुपर्छ ।’

कार्यक्रममा नेपाल शिक्षक महासंघका अध्यक्ष लक्ष्मीकिशोर सुवेदीले आउँदो संसदको हिउँदे अधिवेशनमा शिक्षा विधेयक पारित गर्न दबाब दिन शिक्षकहरुले सडक आन्दोलन गर्नुपर्ने बताए । हिउँदे अधिवेशन शुरु हुनासाथ शिक्षकहरू सडकमा उत्रनुपर्ने बताउँदै अध्यक्ष सुबेदीले शिक्षा विधेयक संसदबाट पारित नभएसम्म आन्दोलन र दबाब जारी राख्नुपर्ने बताए । 

 
शिक्षा विधेयक पारित हुन षडयन्त्र हुनसक्ने भन्दै सुवेदीले छिट्टै २ लाख ५० हजार शिक्षक सडकमा उतारेर शिक्षक आन्दोलन भाग–२ गर्ने महासंघको योजना सुनाए ।  हिउँदे अधिवेशनमा शिक्षा विधेयक संसदबाट पारित हुनै पर्ने बताउँदै उनले अन्यथा शिक्षकले बानेश्वर, सिंहदरबार र बालुवाटार घेर्नुपर्ने अवस्था आउने चेतावनी दिए ।

 
एकीकृत अखिल नेपाल शिक्षक संगठनका अध्यक्ष शंकर अधिकारीले उत्पीडित शिक्षकको अधिकार प्राप्तिका लागि शिक्षा विधेयक संसदबाट पारित हुनैपर्ने बताए । आउँदो संसदको हिउँदे अधिवेशनमा शिक्षा विधेयक पारित नभए शिक्षकहरु सडकमा उत्रिएर दोस्रो आन्दोलन गर्न बाध्य हुने उनको चेतावनी थियो ।

 
अधिकार र कर्तव्यसहित सूचना प्रविधि, आर्टिफिसियल इन्टिलिजेन्सयुक्त गरिखाने शिक्षा निर्माणका लागि मुलुकमा एकीकृत शिक्षक आन्दोलनको खाँचो उनले औँल्याए । 

३ दिनसम्म चल्ने संगठनको परिषद भेलामा देशभरका ५ सय बढी शिक्षकहरुको सहभागिता रहेको आयोजकले जनाएको छ । 

एकीकृत अखिल नेपाल शिक्षक संगठन र शिक्षक समाजबीच एकीकरण 

यसैबीच एकीकृत अखिल नेपाल शिक्षक संगठन र शिक्षक समाज नेपालबीच एकता भएको छ । नेकपा (माओवादी केन्द्र)का अध्यक्ष पुष्पकमल दाहाल (प्रचण्ड)को उपस्थितिमा शनिबार काठमाडौंमा दुई संगठनबीच एकता घोषणा भएको हो ।

योसँगै डा. बाबुराम भट्टराई नेतृत्वको नेपाल समाजवादी पार्टी निकट शिक्षक समाजका सबै तहका कमिटी माओवादी केन्द्रनिकट एकीकृत अखिल नेपाल शिक्षक संगठनमा समाहित भएका छन् ।

कार्यक्रममा एकीकृत अखिल नेपाल शिक्षक संगठनका अध्यक्ष शंकर अधिकारी र शिक्षक समाजका अध्यक्ष ठाकुरनाथ गौतमले संयुक्त रुपमा दुई संगठनबीच एकता भएको घोषणा गरे । कार्यक्रममा दुबै संगठनका केन्द्रदेखि स्थानीयतहसम्मका सबै कमिटीबीच एकता भएको जानकारी उनीहरुले दिएका छन् । 

संगठनका अध्यक्ष अधिकारीले शिक्षक हकहितका आवाज पूरा गर्न आवश्यक भएकाले एकता र ध्रुवीकरण गरिएको बताए । शिक्षक संगठनहरुसित सरकारले गरेका सम्झौता पूरा गराउन फेरि एकताबद्ध आन्दोलन आवश्यक रहेकोमा उनको जोड थियो । 

त्यसैगरी समाजका अध्यक्ष गौतमले शैक्षिक आन्दोलनलाई अघि बढाउदै तार्किक निश्कर्षमा पु¥याउन एकता आवश्यक महसुस गरेर एकीकरण गरिएको बताए । समाजवादी शिक्षा प्रणालीका लागि समाजवादी बौद्धिक शक्ति एक हुनुपर्नेमा पनि उनको जोड थियो ।