३ महिना अघि
२0८१ मंसिर २२ शनिबार
उदयपुर, मङ्सिर २२
‘मर्निङ वाल्क’मा रहेका एक पैदलयात्रीलाई शनिबार विहान हायसले ठक्कर दिदा ज्यान गएको छ । शनिबार विहान ५ः०० बजे बा. प्र. ०१–००६ ख ५८७१ नं. को हायसले ठक्कर दिँदा वाल्कमा रहेका त्रियुगा नगरपालिका ११ चप्पनका ५६ वर्षीय परणशेर राईको निधन भएको हो ।
चप्पनस्थित घरदेखि सडकै सडक आउँदै गरेका राईलाई गाईघाट–दिक्तेल सडकखण्ड त्रियुगा नगरपालिका १० बोक्सेस्थित कोष तथा लेखा नियन्त्रक कार्यालय अगाडि हायसले ठक्कर दिएको थियो । गम्भीर घाईते भएका राईलाई छाडेर हायस भने भागेको थियो । स्थानीयले देखेर प्रहरीलाई खवर गरी घाईते राईलाई उपचारार्थ जिल्ला अस्पताल लगिएकोमा ६ः२५ बजे चिकित्सकले मृत घोषित गरेका थिए ।
काठमाडौँका लागि छुटेको हायस दुर्घटना गराएर भागेकोमा प्रहरीले पिछा गर्दै १ घण्टापछि नियन्त्रणमा लिन सफल भएको छ । गाईघाट–कटारी मदन भण्डारी लोकमार्ग भएर जाने हायस दुर्घटनापछि रुट बद्लेर गाईघाट–लाहान हुँदै जाने क्रममा ७ किलोमिटर पश्चिम त्रियुगा नगरपालिका ६ जलजलेबाट नियन्त्रणमा परेको छ ।
प्रहरीले हायस र चालक महोत्तरीको बर्दीबास नगरपालिका ३ का ४४ वर्षीय रुद्रबहादुर पौडेललाई नियन्त्रणमा लिएर अनुसन्धान थालेको जिल्ला प्रहरीले जनाएको छ । मृतकको शव पोष्टमार्टमका लागि उदयपुर असपतालमै राखिएको छ ।
