३ महिना अघि
२0८१ मंसिर २१ शुक्रबार
उदयपुर, मङ्सिर २२
खोटाङको बुँवा खोलामा मोटरेबल पक्की पुल बन्ने भएको छ । जिल्लाको जन्तेढुङ्गा र बराहपोखरी गाउँपालिका जोड्ने सीमास्थित बुवाँ खोलामा पक्की पुल निर्माण कार्य भर्खरै सुरु भएको हो ।
प्रदेश सरकार भौतिक पूर्वाधार विकास मन्त्रालयको लगानीमा बन्ने पुल यसै सातादेखि निर्माण कार्य सुरु भएको हो । जन्तेढुङ्गा १ को देवीस्थानस्थित मैनाटार र बाराहपोखरी ५ को पौवासेरा बीचमा पर्ने उक्त खोलामा पुल निर्माण गर्ने गरी गत वैशाख ३० गते नै ठेक्का सम्झौता भईसकेको थियो । सम्झौता भए पनि पुलको सिल्यान्यास भने प्रदेश सरकारका भौतिक पूर्वाधार तथा स्वास्थ्यमन्त्री भूपेन्द्र राईले केहीदिनअघि मात्र गरेका छन् । सिल्यान्यास भएसँगै पुल निर्माणको कार्य औपचारिक रुपमा सुरु भएको हो ।
उक्त पुल प्रादेशिक सडक पुल सहयोग एकाई, इटहरीको प्राविधिक सहयोगमा प्रदेश सरकार अन्तरगत पूर्वाधार विकास कार्यालय उदयपुरमार्फत निर्माण हुन लागेको हो । सो पुल मूल्य अभिवृद्धि कर (भ्याट)सहित १७ करोड ५८ लाख ७९ हजार ७ सय २९ रुपैँया लागतमा निर्माण हुने पुल बनाउने जिम्मा जय बागेश्वरी÷रेग्मी÷चुरिया जेभी उदयपुरले पाएको छ ।
पूर्वाधार कार्यालय उदयपुरका प्रमुख (डिई) ललितकुमार चौधरीका अनुसार चिसापानी–देवीस्थान–मैनाटार–पौवासेरा ग्रामिण सडकखण्डमा पर्ने बुवाँ खोलाको उक्त पुल १ सय ४८ मिटर लामो बन्नेछ । डिई चौधरीका अनुसार गतवर्षको बजेटमा स्रोत सुनिश्चित गरेर बनाउन लागिएको उक्त पुलका लागि प्रदेश सरकारले चालु आर्थिकवर्ष आवश्यक बजेट विनियोजन गरेको हो ।
डिई चौधरीले प्रि–स्ट्रेस्ड आरसिसी प्रविधिमा बन्ने पुल ओपन फाउण्डेसनबाट निर्माण हुने बताए । पुल आगामी २०८३ कात्तिक २१ गतेभित्र बनाईसक्ने गरी सम्झौता भएको पनि चौधरीले बताएका छन् । निर्धारित म्यादभित्रै पुल निर्माण कार्य सम्पन्न गर्न ठेकेदार कम्पनीलाई निर्देशन दिइएको पनि चौधरीले बताए ।
सो पुल बनेपछि खोटाङका २ गाउँपालिकाबासीलाई आउजाउ गर्न धेरै सहज हुने जन्तेढुङ्गा गाउँपालिका अध्यक्ष अरुणादेवी राई ‘दिक्षा’ले बताईन् । उनका अनुसार सो पुलले वर्षा याममा सदरमुकाम दिक्तेल आउजाउ गर्न तथा गाउँपालिकाका वडाबासीलाई मुकाम केन्द्र आउन जान पनि सजिलो पार्ने भएकाले स्थानीयबासी खुसी छन् ।
बराहाखोखरी गाउँपालिका अध्यक्ष शालिकराम बन्जराले बुवाँ खोलामा पक्की पुल बनेपछि सदरमुकाम दिक्तेल आउजाउ गर्न तथा छिमेकी गाउँपालिकासँग यातायात सम्पर्क सहज हुने बताए । बुँवा खोला पुल जिल्लाको प्रमुख व्यापारिक केन्द्र सदरमुकाम दिक्तेलदेखि खोटाङ बजार हुँदै दक्षिणी भेगलाई जोड्ने चिसापानी–देवीस्थान–मैनाटार–पौवासेरा सडकखण्डको मुख्य नाका हो ।
दिक्तेलदेखि दक्षिणतर्फका जिल्लाबासीको बाक्लो आउजाउ हुने सो सडक खण्डमा पुल नहुँदा हरेक वर्षायामको भलबाढीले स्थानीयलाई आउजाउमा रोक लगाउने गरेको छ । त्यसैगरी पुलको अभावमा विद्यालय पढ्न आउजाउ गर्ने बालबालिकालाई बाढीले अवरोध गर्नुका साथै ज्यानसमेत लिने गरेको स्थानीय बताउँछन् । दशकयता कच्ची सडक सञ्चालनमा आएको सो खोलामा पुल बन्ने भएपछि स्थानीयमा खुसी छाएको छ ।
