५ दिन अघि
२0८१ कार्तिक २४ शनिबार
उदयपुर, कात्तिक २४
नेपाली काँग्रेसका वरिष्ट नेता डा. शेखर कोईरालाले वर्तमान सरकारले जनपक्षीय काम गर्न नसकेको भन्दै असन्तुष्टि जनाएका छन् । शनिबार त्रियुगा नगरपालिका ११ गाईघाटमा निर्मित बिपी कोईरालाको शालिक अनावरण कार्यक्रममा बोल्दै कोईरालाले सरकारले सय दिनको अवधिमा कुनै उत्साह जनाउन नसकेको बताए ।
प्रतिनिधिसभा सदस्यसमेत रहेका कोईरालाले देशका दुई ठुला पार्टी काग्रेस र एमाले मिलेर बनेको सरकार शासन गर्न नभएर जनताको पक्षमा काम गर्न गएको हुनाले राम्रा काम गर्नुपर्नेमा जोड दिए । दुईतिहाई बहुमतको सरकारले जनतामा उत्साह भर्ने र आशा, भरोसा जगाउने खालका काम गर्न उनको आग्रह थियो ।
दुई ठुला पार्टीको सरकारले पनि जनतामा आशा जगाउन नसके देश ठुलो दुर्घटनामा जान सक्ने चिन्ता उनलाई थियो । सरकारले भ्रष्टाचार र बेथितिविरुद्ध कुनै कार्यक्रम ल्याउन नसकेको भन्दै उनले प्रधानमन्त्री केपी ओलीले भनेको ‘आफु भ्रष्टाचार गर्दिन र गर्न पनि दिन्न’ भन्ने कुरा गलत प्रमाणित भएको बताए ।
सत्ता गठबन्धन गर्नेबेला संविधान संशोधनलगायत ७ बुदेँ साझा कार्यक्रम बनाएको स्मरण गराउँदै उनले त्यो कार्यक्रम कति कार्यान्वयन भयो भएन भन्ने कुराको लेखाजोखा गर्ने बेला भएको बताए । उनले संविधान संशोधनजस्तो कुरा सबै राजनीतिक दलहरुसँग छलफल गरेर मात्र संभव हुने बताए ।
कोईरालाले आफुलाई बिपक्षीभन्दा पनि आफ्नै पार्टीदेखि डर लागेको बताए । सँस्थापन इतर नेताको परिचय बनाईसकेका नेता कोईरालाले आफु समर्थकहरुलाई ढाडस दिदै निराश र हतास नभई उत्साहपूर्वक अघि बढ्न आग्रह गरे । पार्टीको १५ औँ महाधिवेशन आउन १ वर्ष बाँकी रहेको भन्दै तोकिएकै अवधिमा महाधिवेशन गर्न सबै कार्यकर्ताले केन्द्रीय नेतृत्वलाई दबाब दिनुपर्ने पनि बताए ।
‘तपाँईहरु निराश हुनुपर्दैन, म न्याय दिन सक्छु, मलाई साथ दिनुहोस्’ नेता कोईरालाले समर्थकलाई ढाडस दिदै भने ‘पार्टी नेतृत्वले गरेको गलत रबैयाको खुलेर स्वस्थ्य आलोचना गर्न पछि पर्नुहुन्न, म तपाँईहरुसँग छ, हतास र निराश हुनुपर्दैन ।’ चौधौँ महाधिवेशनमा सभापतिका पराजित उम्मेदवार कोईरालाले घुमाउरो तर, प्रष्ट रुपमा आगामी महाधिवेशनमा सभापतिको दावेदारी प्रस्तुत गरे ।
कार्यक्रममा नेताहरु राजिव कोईराला, गुरुराज घिमिरे, केदार कार्की र स्थानीय नेताहरु काँग्रेस जिल्ला उपसभापति भिमचन्द्र राई, प्रदेशसभा सदस्य लिला राई, प्रतिनिधिसभा निर्वाचन क्षेत्रीय सभापतिहरु खगेन्द्र राई र रामकुमार खत्री, प्रदेश सभापति सरोज बस्नेतलगायत नेताहरुले बिपीको विचार र संगठन सुदृढीकरणबारे मन्तव्य राखेका थिए ।
मदन भण्डारी लोकमार्ग अन्तर्गत त्रियुगा नगरपालिका ११ गाईघाट बिपी चोकमा निर्मित शालिक त्रियुगा नगरपालिकाले निर्माण गरेको हो । फाईबरबाट निर्मित अद्र्धकदको शालिक बनाउन नगरपालिकाले २ लाख ७५ हजार खर्च गरेको त्रियुगा नगरप्रमुख बसन्त बस्नेतले बताए । मेयर बस्नेतका अनुसार सो ठाउँलाई ०४७ सालमै तत्कालीन काँग्रेस सभापति गिरीजाप्रसाद कोईरालाले बिपी चोक नामाकरण गरेका थिए ।
