१ महिना अघि
२0८१ कार्तिक ४ आईतवार
उदयपुर, कात्तिक ४
उदयपुरकी एक युवतिको बस दुर्घटनामा परेर निधन भएको छ । गाईघाटदेखि झापाको काकडभिट्टाका लागि छुटेको प्रदेश १–०१–००१ ख् ४१२६ नं. को बस मधेस प्रदेशस्थित सप्तरीको बरमझियामा दुर्घटना हुँदा २१ वर्षीया मैया राईको निधन भएको हो ।
हिमाली यातायात प्रालिद्वारा सञ्चालित पारुहाङ ट्राभल्स कन्चनरुप नगरपालिकाको बरमझियामा दुर्घटना हुँदा २६ जना यात्रु घाईते भएको हिमाली यातायात प्रालिले जनाएको छ । प्रत्यक्षदर्शीका अनुसार विपरित दिसाबाट आउँदै गरेको स ५ प १५९३ नं. को मोटरसाईकललाई बँचाउन खोज्दा अनियन्त्रित भई बस कोल्टे परेर दुर्घटना भएको हो ।
दुर्घटनामा परी राईको घट्नास्थलमै निधन भएको प्रालिका महासचिव उमेश बस्नेतले बताएका छन् । उनका अनुसार घाईते २६ मध्ये दर्जन हाराहारीको अवस्था गम्भीर भएकाले विराटनगर रिफर गरिएको छ ।
अन्य साधारण घाईतेहरुको उद्धार गरी स्थानीय स्वास्थ्य केन्द्र तथा सप्तरी सदरमुकाम राजविराजस्थित जिल्ला अस्पतालमा उपचारार्थ पठाइएको छ ।
मृतक उदयपुरकै भए पनि आधिकारिक ठेगाना र सबै विवरण खुसिसकेको छैन । उदयपुर प्रहरीले घट्नाको पुष्टि गर्दै सबै विवरण लिन बाँकी रहेको जनाएको छ । सप्तरी जिल्लाको घट्ना भएकाले उदयपुर प्रहरीसँग विस्तृत विवरण अहिले नभएको जनाएको छ ।
