चाडबाड लक्षित भत्ता वितरण सुरु

१ महिना अघि

उदयपुर, असोज १३

खोटाङको साकेला गाउँपालिकाले नजिकिएको दशैँ तिहार लक्षित गर्दै वडावडामा घुम्ती शिविर सञ्चालनमार्फत सामाजिक सुरक्षा भत्ता वितरण गर्न थालेको छ । चालु आर्थिक वर्षको प्रथम चौमासिक भत्ता वितरण गर्न गाउँपालिकाले प्रत्येक वडामा घुम्ती शिविर खटाएको हो ।

बैङ्कङ प्रणालीमार्फत वितरण गरिने भत्ता यसअघिदेखि नै गाउँपालिकाले वडावडामा शिविर सञ्चालन गरी वितरण गर्दै आएको छ । जस अनुसार यसवर्षको प्रथम त्रैमासिक भत्ता पनि वडामै पुगेर वितरण गर्न थालिएको गाउँपालिका अध्यक्ष रविप्रकाश राईले बताए । उनका  अनुसार लक्षित बर्गलाई गाउँपालिका केन्द्रमा रहेको बैङ्कसम्म धाउन दुःख नहोस् भनेर घर पायक शिविर राखेर वितरण गर्न थालिएको हो । 

भत्ता वितरण गर्न आयोजित शिविरमा गाउँपालिका र बैङ्कका कर्मचारीको संयुक्त टोली खटाइएको छ । बृद्धवृद्धा, अशक्त र अपाङ्गता नागरिकलाई गाउँपालिका केन्द्रस्थित बैङ्क आउन शारिरीक कष्ट तथा समय र पैसा खर्च हुन नदिन वडामै शिविर राखेर भत्ता बाँड्ने योजना बनाएको अध्यक्ष राईले बताए । साकेलाले सामाजिक सुरक्षाभत्ता वितरण गर्ने सम्झौता गरे अनुसार नेपाल एसबिआई बैङ्कले आफ्ना कर्मचारी भत्ता वितरण गर्न परिचालन गरेको छ । 

जनप्रतिनिधि भनेको जनताको सेवक र अभिभावकसमेत भएको र अझ ज्येष्ठ नागरिक र शारीरिक अशक्तहरूलाई सहज सेवा दिन शिविर राखिएको अध्यक्ष राईले बताए । उनले जनताको सेवामा कुनै कसर बाँकी नराख्ने आफ्नो धारणा रहेको पनि बताए । बृद्धबृद्धा र अशक्त अपाङ्गता भएकाहरूलाई बैङ्क र गाउँपालिकाका कर्मचारीको टोली वडावडामा खटाएर भत्ता वितरण गर्ने गरेको बताए । 

भत्ता वितरण गर्न आईतबारदेखि शिविर सञ्चालन गरिएको र पहिलो दिन रतन्छास्थित २ नं. वडा कार्यालयबाट भत्ता वितरण थालिएको छ । त्यहाँको शिविरबाट १ सय १७ जनालाई भत्ता बाँड्ने गरी १७ लाख ३६ हजार रकम पठाइएको बैङ्कका प्रबन्धक मेदानीप्रसाद रिजालले बताए । 

साकेलामा चालु वर्षको पहिलो त्रैमासिकका लागि १ हजार ३ सय ३३ जना लाभग्राहीले भत्ता प्राप्त गर्नेछन् । जसका लागि गाउँपालिकाले १ करोड ३४ लाख २० हजार ४ सय २५ रुपैंया निकासा गरेको सामाजिक सुरक्षा शाखाका संयोजक डिएम चामलिङ राईले बताएका छन् । उनका अनुसार भत्ता वितरणका लागि कर्मचारी टोली सातादिनसम्म परिचालन हुनेछ । 

दोस्रो दिन १४ गते ५ नम्बर वडा कार्यालय मात्तिमबिर्तामा शिविर राखिनेछ भने १५ गते ३ नम्बर वडा कार्यालय खिदिमा, १६ गते ४ नं. वडा मात्तिममा भत्ता वितरण गर्ने कार्यतालिका छ । त्यस्तै असोज १८ गते १ नम्बर वडा कार्यालय बाँझेच्यानडाँडा र २० गते १ कै चण्डेश्वरी आधारभूत विद्यालयमा वितरण गर्दै शिविर समाप्त हुनेछ । 

भत्ता लिन शिविरस्थल आउन नसक्ने सेवाग्राहीहरुले एसबिआई बैङ्का देशभर जुनसुकै शाखाबाट लिनसक्ने व्यवस्था मिलाइएको पनि प्रवध्क रिजालले बताएका छन् ।