२ हप्ता अघि
२0८१ भाद्र २७ बिहीबार
उदयपुर, भदौ २७
नेकपा (माओबादी केन्द्र)का नेता राजन किराती (बासु) प्रदेशसभा संसदीय समितिको सभापति चयन हुने पक्का भएको छ । उदयपुर निर्वाचन क्षेत्र नं. १ (क)बाट निर्वाचित सांसद किराती १ नं. प्रदेशसभाको सार्वजनिक लेखा समितिको सभापति चयन हुने निश्चित भएको हो ।
पार्टी १ नं. प्रदेश कमिटी सदस्य तथा जिल्ला सहइन्चार्जसमेत रहेका किरातीले सार्वजनिक लेखा समिति सभापतिका लागि विहीबार उम्मेदवारी दर्ता गराएका छन् । उनीसँगै ७ वटै समितिका सभापतिमा मनोनयन परेको प्रदेश सचिवालयले जनाएको छ । ३ दलीय सहमति तथा सार्वजनिक लेखा समितिको सभापति प्रमुख प्रतिपक्षी दलले पाउने कानुनी आधार अनुसार माओबादीलाई सो समिति प्राप्त भएको हो ।
प्रदेशसभा सचिवालय सचिव गोपाल पराजुलीका अनुसार एमालेको भागमा परेको प्राकृतिक स्रोत तथा पूर्वाधार समितिमा होमबहादुर थापाले मनोनयन गर्दा न्याय, प्रशासन तथा विधायन समितिमा कमला दर्नाल र उद्योग, पर्यटन तथा वातावरण समितिमा रामदेव यादवले सभापतिका लागि मनोनयन दर्ता गराएका छन् ।
कांग्रेसले पाएको ३ समिति सभापतिमा क्रमशः गयानन्द मण्डल सामाजिक विकास, खगेश्वरी पौडेल सुशासन तथा योजना र विनोद राइले अर्थ समितिको सभापति हुन उम्मेदवारी दर्ता गराएका छन् ।
शुक्रबार २८ गते चुनाव तोकिए पनि सबैमा एकल उम्मेदवारी परेका कारण चुनाव नगरी किरातीलगायत ७ वटै समिति सभापति निर्विरोध निर्वाचित भएको घोषणा सभामुखले गर्नेछन् । चुनाव भएको झण्डै २ वर्षपछि प्रदेशसभाले संसदीय समितिहरु गठन गर्न लागेको हो । ०७९ मंसिर ४ गते चुनाव भएको १ वर्ष ९ महिनापछि प्रदेशसभा समितिहरुले पूर्णता पाउन लागेका हुन् ।
