२ महिना अघि
२0८१ भाद्र २0 बिहीबार
कटारी, भदौ २०
कटारी नगरपालिका १० नं. वडाको सोरुङछबिसेमा एकै घरका आमा छोरा घरभित्रै मृत अवस्थामा फेला परेका छन् । स्थानीय अशोक थापाकी ३७ वर्षीया श्रीमति निर्मला थापा र ६ वर्षीय छोरा आरुस घरभित्रै विहीबार विहान मृत भेटिएको प्रहरीले जनाएको छ ।
स्थानीयहरुले घरभित्र आमाछोरालाई मृत अवस्थामा देखेपछि प्रहरी चौकी सोरुङछविसेमा खवर गरेका थिए । चौकीबाट खटेको टोलीले घरभित्र आमा छोरालाई रक्तमुछेल अवस्थामा मृत भेटेको इलाका प्रहरी कार्यालय कटारीले पुष्टि गरेको छ । भर्खृरै इप्रका कटारीका इन्स्पेक्टर उमेश महतो नेतृत्वको टोली घट्नास्थल पुगेर अनुसन्धान सुरु गरेको जनाइएको छ ।
घरभित्र दुईजना मृत भेटिए बाहेक अन्य केही कुरा अहिलेसम्म नखुलेको इन्स्पेक्टर महतोले बताए । उनका अनुसार घट्ना राति घटेको हुनसक्ने र प्रकृति हेर्दा हत्याको आशंका गर्न सकिने भए पनि विस्तृत तथ्य खुल्न अहिले नै नसक्न उनले बताए ।
कटारी नगरप्रमुख राजेशचन्द्र श्रेष्ठले घरभित्रै आमा छोरा मृत भेटिनु अत्यन्त दुःखद घट्ना भएको बताएका छन् । उनले घट्नाको सुक्ष्म अनुसन्धान गर्न पनि प्रहरी प्रशासनसँग आग्रह गरेका छन् । मृतकका पति अशोक घरमा नरहेको र आमा छोरा मात्र बस्दै आएको मेयर श्रेष्ठले बताए । श्रीमान् दोस्रो विहे गरेर भारत पलायन भएदेखि निर्मला नाबालक छोरा आरुससँग बस्दै आएको उनले बताए ।
