साकेलाको शैक्षिक सुधार अभियानः विव्यस अध्यक्षसँग छलफल 

१ महिना अघि

उदयपुृर, साउन ३०

सामुदायिक विद्यालयको शैक्षिक सुधार अभियानमा जुटेको खोटाङको साकेला गाउँपालिकाले विद्यालय लक्षित विविध गतिबिधि सुरु गरेको छ । शिक्षामा सुधार नभएसम्म अन्य सुधार संभव नहुने निश्कर्ष निकालेको गाउँपालिका पछिल्लो समय आक्रामक शैक्षिक सुधार अभियानमा जुटेको हो । 

यस क्रममा सामुदायिक विद्यालयको अनुगमन, आवश्यक सामग्री वितरण, दक्ष जनशक्ति व्यवस्थापन, प्रशासनिक कडाई, शिक्षक विद्यार्थीको नियमित उपस्थिति, तोकिए अनुसार विषयगत पठनपाठन आदि कार्य गराउन थालिएको छ । केहीदिनयता विद्यालयको छड्के अनुगमन थालेको गाउँपालिकाले भर्खरै विद्यालय व्यवस्थापन समिति अध्यक्षहरुसँग परामर्श गर्न थालेको छ । 

दरवन्दी अनुसार विषयगत शिक्षक नहुनु र अनियमित शिक्षक सरुवा हुने प्रवृत्तिले र्शक्षिक गुणस्तर खस्केको निष्कर्ष पनि गाउँपालिकाले निकालेको छ । सामुदायिक विद्यालयको शैक्षिक सुधार गर्न सके मात्र नतिजा सुधार गर्न सकिने उद्देश्यले गाउँपालिकाले विव्यस अध्यक्षहरुसँग परामर्श थालेको गाउँपालिका अध्यक्ष रविप्रकाश राईले बताए । उनका अनुसार भर्खरै सम्पन्न विव्यस अध्यक्षहरुसँगको अन्तरक्रियात्मक छलफलबाट यस्तो निष्कर्ष निस्केको हो ।

अनियमित तवरले शिक्षक सरुवा गर्नु गुणस्तरीय शिक्षाको मापदण्ड विपरित कार्य भएको निष्कर्ष पनि छलफलले निकालेको छ । छलफलमा विव्यस अध्यक्षहरुले आगामी दिनमा शिक्षक सरुवा गर्दा सम्बन्धित निकाय (सरकार) गम्भीर हुनुपर्ने सुझाव दिएका छन् । मंगलबार अध्यक्ष राईक कार्यकक्षमा सम्पन्न छलफलमा गाउँपालिकाभित्रका ६ वटा माविका
विव्यस अध्यक्षहरु सहभागी थिए । 

छलफलमा गाउँपालिकाको समग्र शैक्षिक क्रियाकलापलाई प्रभावकारी र गुणस्तरीय बनाउन शिक्षा शाखाले विविध कार्यक्रमलाई निरन्तरता दिन थालेको र यसमो मुख्य लक्ष्य सामुदायिक विद्यालयको शैक्षिक अवस्था सुधार गर्नु रहेकोमा जोड दिइयो । गुणस्तरीय शिक्षा प्रदान गर्नका लागि साकेलाभित्रका २८ वटै सामुदायिक विद्यालयका प्रधानाध्यापक र विषयगत शिक्षकसँग बृहत अन्तरक्रिया यसअघि नै सम्पन्न भईसकेको उनले बताए । 

त्यसैगरी विद्यालयको अनुगमन नियमित गर्ने कुरालाई प्राथमिकता दिइएको छ भने हरेक विद्यालयका विव्यससँगको अन्तरकृयालाई निरन्तरता दिदै गुणस्तरीय र नतिजामूलक शिक्षा पद्धतिबारे छलफल सुरु भएको छ । शैक्षिक अवस्था सुधार गरी गुणस्तरीय शिक्षा प्रदान गर्न सके उत्कृष्ट नतिजा ल्याउन सफल भइने आँकलन गरिएको छ । हरेक शैक्षिक गतिविधिमा शिक्षक, अभिभावक, विद्यार्थीले साथ दिनुपर्ने गाउँपालिका अध्यक्ष राई बताउँछन् । 

‘हामी नतिजामूलक, व्यवहारिक र नैतिक शिक्षालाई प्रथमिकता दिएर अघि बढिरहेका छौँ’ अध्यक्ष राई भन्छन् ‘त्यसका लागि गाउँपालिकाले स्थानीय पाठ्यक्रम निर्माण गरेर कार्यान्वयन गर्ने तयारी गरेको छ ।’ त्यसो त साकेलाभित्रका हरेक विद्यालयमा नैतिक शिक्षाको थालनी यसै शैक्षिक सत्रबाट सुरु भईसकेको छ । गाउँ शिक्षा समितिले निर्णय गरेरै हप्ताको हरेक शुक्रबार अनिवार्य अतिरिक्त क्रियाकलापको सट्टामा नैतिक शिक्षा पठनपाठन गराउन थालिएको छ । 

गुणस्तरीय र व्यवहारिक शिक्षा प्रदान गर्दैै विद्यार्थीलाई नतिजामूलक उदेश्य प्राप्तीका लागि केन्द्रित गर्न थालिएको छ । शैक्षिक सुधार कार्यक्रम अन्तर्गत अन्य विद्यालयका विव्यस अध्यक्ष र पदाधिकारीबीच पनि निरन्तर अन्तरक्रिया तथा प्रत्यक्ष विद्यालय अनुगमन कार्य गरिदै आएको शिक्षा शाखा संयोजक कविराज राईले बताएका छन् ।