सुन नदीमा डुबेका मृतक परिवारलाई राहत वितरण

५ महिना अघि

साउने, जेठ २७

होलीमा रङ खेलेर नुहाउने क्रममा सुन नदीमा डुबेर ज्यान गुमाएका बालबालिकाको परिवारलाई त्रियुगा नगरपालिकाले राहत उपलब्ध गराएको छ । गत चैत ११ गते होली खेलेर नदीमा नुहाउने क्रममा बेपत्ता भएर ज्यान गुमाएका त्रियुगा नगरपालिका १४ साउनेका ३ बालबालिकाको परिवारलाई नगरले राहत दिएको हो । 

विहानैदेखि होली खेलेर ६ किलोमिटर तल उदयपुर र खोटाङको सीमा धाब्लाङस्थित सुन नदीमा नुहाउदै गर्दा डुबेर साउनेका रुद्र पुलामीकी छोरी १२ वर्षीया रेखा, केदार मगरका छोरा ९ वर्षीय रिदम र मेहरमान मगरका छोरा १२ वर्षीय लोकबहादुरको निधन भएको थियो । 

शनिबार साउनेमा आयोजित एक कार्यक्रममा नगरप्रमुख बसन्त बस्नेतले मृतक परिवारलाई नगद राहत प्रदान गरे । नगर कार्यपालिका बैठक निर्णय अनुसार प्रति परिवार २५ हजारका दरले राहत दिइएको वडाध्यक्ष हिमराज मगरले बताए । पीडित परिवारलाई राहत दिदै मेयर बस्नेतले समबेदना व्यक्त गरे । उनले तत्काल र धेरै राहत दिन चाहे पनि स्रोतको अभावमा चर्केको घाउमा मल्हमपट्टी लगाउने मात्र भए पनि थोरै रकम राहत दिएको बताए । 

घट्ना भएलगत्तै राहत दिन चाहे पनि समयमा बजेट प्राप्त नहुँदा केही ढिला भएकोमा मेयर बस्नेतले माफी मागे । बिपत् अकस्मात आईपर्ने र आफ्ना कारणले पनि हुने भन्दै मेयर बस्नेतले दुवैखाले बिपतबाट बँच्न सचेतना र सतर्कता अपनाउन पूर्वतयारीमा लाग्नुपर्ने बताए । 

भूगोल र जनसङ्ख्याको हिसावले निकै ठूलो, पहाड र भित्री मधेस समेटिएको त्रियुगा नगरपालिकामा वर्षेनी विभिन्न विपतजन्य घटना घटिरहने भएकाले राहत र उद्धारमा धेरै खर्च हुँने गरेको उनले बताए । वर्षेनी हुने बिपतजन्य घट्नाको ठूलो जनधनको क्षति कम गर्न पनि सबै सचेत र पूर्व तयारीमा लाग्न मेयर बस्नेतको आग्र थियो । 

उनले नगरपालिका जनताको आर्थिक हैसियत उकास्न विभिन्न कार्यक्रम र योजना बनाएर अघि बढिरहेको भन्दै पेशा र उद्यम व्यवसायमा लाग्नेलाई नगरपालिकाले सहयोग गर्ने प्रतिबद्धता जनाए । उनले पछिल्लो समय अरुको कमजोरी खोज्दै कुरा काट्ने काममा मात्र लाग्ने डरलाग्दो प्रबृत्तिको विकास भएको गुनासो गर्दै त्यसको साटो उद्यम, व्यवसाय र पेशामा लागेर उत्पादन र उत्पादकत्वमा जोडिन आग्रह गरे । 

त्रियुगाको १४ नं. वडा अदुवा, बेसार र कफी खेतीका लागि उर्वर भूमि र माटो, हावापानीेको ठाउँ रहेको प्रमाणित भईसकेकाले त्यस्तो व्यवसायमा लाग्न सके रोजगारी सिर्जना हुनुका साथै आयआर्थन बढेर आत्मनिर्भर हुन सकिने उनको भनाई थियो ।