३ महिना अघि
२0८१ जेष्ठ २१ सोमबार
उदयपुर, जेठ २१
नेपाली सेनाको १८ नं. बाहिनी अड्डा भुल्केको आयोजनामा गाईघाटमा सोमबारदेखि ‘बाहिनीपति ट्रफि २०८१ खेलकुद प्रतियोगिता ०८१’ सुरु भएको छ । बाहिनीको आयोजनामा त्रियुगा नगरपालिका १३ गाईघाटस्थित थरुहट उदयपुर रङ्गशालामा विभिन्न विधामा प्रतियोगिता सुरु भएको हो ।
प्रतियोगितामा बाहिनी अड्डा अन्तर्गतका पशुपतिप्रसाद गण उदयपुर, दुर्गाबक्स गण ओखलढुङ्गा र रणभीम गण खोटाङका खेलाडीको सहभागिता रहेको आयोजक बाहिनी अड्डाले जनाएको छ । फुटबल, तेक्वान्दो, बक्सिङ, स्विमिङ, सुटिङ र एथलेटिक्समा स्पर्धा गराइने प्रतियोगिता वार्षिक तालिका अनुसार आयोजना गरिएको बाहिनीले जनाएको छ ।
सोमबार बाहिनीपति सहायक रथी मनोज बैदवारले प्रतियोगिताको उद्घाटन गर्दै नेपाली सेनाका सकल दर्जालाई सैनिक तालिमसँगै खेलकुदक्षेत्रमा पनि अभ्यस्त बनाउन प्रतियोगिता आयोजना गरिएको बताए । उनका अनुसार वार्षिक तालिका अनुसार यो प्रतियोगिता गरिएको हो ।
आगामी १० दिनसम्म सञ्चालन हुने प्रतियोगिताको पहिलो दिन सम्पन्न फुटबल खेलमा दुर्गाबक्स गण ओखलढुङ्गा १–० गोल अन्तरले विजय भएको छ । खेलको मध्यान्तरअघि गोकुल कुँवरले गरेको पहिलो गोल नै अन्तिम र निर्णायक बन्दै दुर्गाबक्सका लागि विजयी यात्रा सहज बनेको हो ।
लिग प्रणालीमा खेलाइने फुटबलको अर्को स्पर्धा बुधबार हुने प्रतियोगिताका खेल संयोजक सहसेनानी देवराज गुरुङले बताए । गुरुङका अनुसार सो दिनको पशुपति र रणभीम गणबीच प्रतिस्पर्धा हुनेछ । सोमबारको खेलमा भने तेक्वान्दोका खेलाडीबीच प्रतिस्पर्धा हुनेछ ।
