५ महिना अघि
२0८१ जेष्ठ १७ बिहीबार
उदयपुर, जेठ १७
‘गणतन्त्र दिवस ०८१’को उपलक्ष्यमा आयोजित निःशूल्क आँखा शल्यक्रिया शिविरमा उदयपुरका ९२ जना मोतियाविन्दुका विरामीले आँखा देख्न पाएका छन् । नेपाल नेत्रज्योति संघ उदयपुरले सगरमाथा चौधरी आँखा अस्पताल लाहानसँगको साझेदारीमा सञ्चालन गरेको शिविरले ३७ महिलासहित ९२ जना मोतियाविन्दु विरामी आँखा देख्न सफल भएका हुन् ।
सदरमुकाम गाईघाटस्थित मदन भण्डारी आँखा अस्पतालमा १५ र १६ गते २ दिन चलेको अप्रेसन शिविर पहिलो दिन ५४ र बाँकीको भोलिपल्ट अप्रेसन गरिएको चौधरी आँखा अस्पताल लाहानका प्राविधिक दिवाकर चौधरीले बताए । उनका अनुसार शिविरमा सबैको आँखा निःशूल्क अप्रेसन गर्नुका साथै औषधि र चश्मासमेत उपलब्ध गराइएको छ ।
अप्रेसन गरिएका विरामीको बिहीबार विहान सगरमाथा चौधरी आँखा अस्पताल लाहानका डा. महेश चौकरीले विरामीको आँखाका पट्टी खोलेका थिए । सो अवसरमा प्रमुख जिल्ला अधिकारी हरिप्रसाद घिमिरेले अप्रेसन गरिएका विरामीलाई चश्मा हस्तान्तरण गर्दै स्वास्थ्य लाभको कामना गरे ।
नेत्रज्योति संघका उपाध्यक्ष कुमार घिमिरेले विरामीको स्वास्थ्य लाभको कामना गर्दै छरछिमेकमा रहेका आँखा रोगीहरुलाई उपचार गर्न मदन भण्डारी आँखा अस्पतालमा जान सल्लाह दिन आग्रह गरे । उनका अनुसार ०७८ सालमा उद्घाटन भएको मदन भण्डारी आँखा अस्पतालले हालसम्म ८ सय १४ जनाको आँखा निःशूल्क रुपमा उपचार गरिसकेको बताए ।
नेत्रज्योति संघमा अध्यक्ष भागवत राउतले आँखा रोगीहरुको ज्योति फर्काउने उदेश्यले स्थापना भएको अस्पतालले प्रत्येक महिना अप्रेसन शिविर सञ्चालन गर्दै आएको बताएका छन् । उनका अनुसार संघले विभिन्न स्थानीयतहहरुमा गई आँखा जाँच शिविर सञ्चालन गर्ने गरेका र त्यसमा फेला परेका मोतियाविन्दुका विरामीलाई सदरमुकाम ल्याएर अप्रेसन गरी ज्योति फर्काउने काम गर्ने गरेको छ ।
यसपटकको शिविरमा रौतामाई गाउँपालिकामा सञ्चालित शिविर र आँखा उपचार केन्द्र गाईघाटमा जँचाउँदा फेला परेका मोतियाविन्दुका विरामीको अप्रेसन गरिएको उनले बताए । उपचार केन्द्रका चिकित्सक डण्डीराज तिम्सीनाका अनुसार हरेक दिन आँखा जँचाउन आउने विरामीहरुमा कोही न कोही मोतियाविन्दुका विरामी फेला पर्ने गरेका छन् ।
यसरी फेला परेका मोतियाविन्दुका विरामीलाई पहिला पहिला लाहान लगेर अप्रेसन गर्ने गरिएकोमा अस्पताल स्थापनापछि गाईघाटमै अप्रेसन गर्न सहज भएको तिम्सीनाले बताए । जसले गर्दा उदयपुर र छिमेकी जिल्ला खोटाङ आसपासका विरामीले गाईघाटमै आँखा उपचार गर्न पाउने सेवा संभव भएको छ ।
नेत्रज्योति संघको पहलमा गाईघाटस्थित त्रियुगा नगरापालिका १० बाँसबारीमा सुविधा सम्पन्न अस्पताल भवन निर्माण गरिएको छ । तत्कालीन सांसद मञ्जुकुमारी चौधरीको ०७३÷७४ को संसदीय विकास कोष, उनी मन्त्री भएपछि ०७४÷७५ मा नेपाल सरकार र जापान सरकारको १ करोड गरी झण्डै ३ करोड लागतमा बनेको साढे ३ तले भवनमा मदन भण्डारी आँखा अस्पताल सञ्चालनमा ल्याइएको हो ।
गाईघाटमा दैनिक अप्रेसन गर्ने विरामी नहुने भएकाले महिनामा एकपटक अप्रेसन शिविर सञ्चालन गरिदै आएको छ । तर, अहिलेलाई संघले विभिन्न स्थानीइतहमा सञ्चालन गरेको शिविरमा भेटिने मोतियाविन्दुका विरामीको अप्रेसन गर्ने गरिएको अध्यक्ष राउतले बताएका छन् ।
