५ महिना अघि
२0८0 चैत्र २५ आईतवार
उदयपुर, चैत २५
एउटा स्कुटीले अर्कोलाई ओभरटेक गर्ने क्रममा भएको दुर्घटनामा परी त्रियुगा नगरपालिका १३ ज्योति टोलकी लिला खत्रीको निधन भएको छ । सदरमुकाम गाईघाटस्थित आँखा अस्पतालछेउमा बोक्सेदेखि आएको स्कुटीलाई अर्को सोही दिसाबाट आएको स्कुटीले ओभरटेक गर्ने क्रममा दुर्घटनामा परी ३८ वर्षीया खत्रीको निधन भएको हो ।
शनिबार दिउँसो ३ः५० बजे त्रियुगा नगरपालिका ११ आँखा अस्पतालछेउमा बोक्सेबाट गाईघाटतर्फ आउँदै गरेको स ८ प ४३२९ नं. को स्कुटीलाई सोही दिशाबाट आएको प्र १–०५–००१ प ९४३३ नं. को अर्को स्कुटीले ओभरटेक गर्न खोज्दा दुर्घटना भएको थियो । दुर्घटनामा परी अगाडिको स्कुटी चालक खत्री गम्भीर घाईते भएकी थिईन् ।
टाउको र अनुहारभरी घाउचोट लागेर अचेत भएकी खत्रीलाई जिल्ला अस्पतालमा प्रारम्भिक उपचारपछि विराटनगर न्युरो पठाइएको थियो । तर, न्यूरोमा उपचार नहुने भएपछि फिर्ता ल्याइएको उनको आईतबार विहान जिल्ला अस्पतालमा उपचारको क्रममा निधन भएको प्रहरीले जनाएको छ ।
न्युरोबाट फिर्ता ल्याएर उपचारकै क्रममा विहान १०ः३० बजे अस्पतालले खत्रीलाई मृत्त घोषित गरेको जिल्ला प्रहरी प्रवक्ता डिएसपी हरिनन्दन चौधरीले बताए । उनका अनुसार मृत्तकको शव पोष्टमार्टमका लागि अस्पतालको शवगृहमा राखेर थप कानुनी प्रक्रिया अघि बढाइएको छ ।
सोही स्कुटीको पछाडि सवार ज्योतीटोलकै ३२ वर्षीया कल्पना खत्रीको बाँया गाला र दुवै हातमा चोट लागेर घाईते भएकी छिन् । उनको जिल्ला अस्पताल गाईघाटमै उपचार भईरहेको छ र स्थिति सुधारोन्मुख रहेको प्रहरीले जनाएको छ । ओभरटेक गर्ने ९४३३ नं. को स्कुटीको पछाडि सवार त्रियुगा १० घलेटोलका २५ वर्षीय निशान भुजेल सामान्य उपचारपछि डिस्चार्ज भएका छन् ।
ओभरटेक गर्ने ९४३३ नं. को स्कुटी चालक त्रियुगा नगरपालिका १० घलेटोलकै २४ वर्षीय विशाल भुजेललाई नियन्त्रणमा लिएर प्रहरीले अनुसन्धान गरिरहेको छ । घट्नास्थल जिल्ला प्रहरी कार्यालय उदयपुरबाट झण्डै १ किलोमिटर दक्षिणमा छ । घट्नास्थलमा खटेको प्रहरी सहायक निरीक्षक टोलीले घाईतेहरुको उद्धार गरी अस्पताल लगेको थियो ।
