५ महिना अघि
२0८0 चैत्र १४ बुधबार
उदयपुर, चैत १४
गत आईतबार होली खेलेर नुहाउन जाँदा सुन नदीमा डुबेर बेपत्ता त्रियुगा नगरपालिका १४ साउनेका तीन बालबालिका मृत फेला परेका छन् । उदयपुर र खोटाङको बीच भएर बग्ने सुन नदीमा नुहाउने क्रममा डुबेर बेपत्ता भएका बालबालिका सबै मृत भेटिएका हुन् ।
हराईरहेका बालबालिकामध्ये २ जना बुधबार र १ जना अघिल्लो दिउसो मृत भेटिएको वडाध्यक्ष हिमराज मगरले बताए । उनका अनुसार बुधबार ८ घण्टाको फरकमा १२ वर्षीय रेखा मगर र सोही उमेरका लोकबहादुर मगर भेटिएका छन् ।
९ वर्षीय रिदम मगर भने अघिल्लो दिउसै भेटिएका थिए । लोकबहादुर विहान दिउसो ३ः३० बजे घट्नास्थलदेखि अढाई किलोमिटर तल कम्पुघाटमा भेटिएका हुन् भने रेखा विहान ७ः३० बजे २ किलोमिटर तल सिम्लेमा फेला परेका थिए । रिदम भने १ किलोमिटर तल घिर्लिङमा भेटिएका थिए ।
तीनैजना बालबालिकाको शव पोष्टमार्टमका लागि सदरमुकामस्थित उदयपुर जिल्ला अस्पताल गाईघाट ल्याइएको छ । पोष्टमार्टम गरेर आफन्तको जिम्मा लगाउने तयारी भईरहेको जिल्ला प्रहरी कार्यालय उदयपुरले जनाएको छ ।
घट्ना भएको दिन राति अवेरसम्म खोज्दा पनि नभेटिएपछि सोमबारदेखि गाईघाटस्थित सशस्त्र प्रहरी बल ५ नं. हेडक्वाटर त्रियुगाको उद्धार टोलीसँगै दर्जन बढी गोताखोरको टोलीले खोजी गर्न थालेको थियो । खोजी कार्य भईरहेकै बेला तीनैजना बालबालिका नदी किनारमा तैरिरहेको अवस्थामा मृत भेटिएका हुन् ।
मृतकहरु रेखा स्थानीय रुद्र पुलामीकी छोरी हुन् भने लोकबहादुर मेहरमान मगरका छोरा तथा रिदम केदार मगरका छोरा र्भएको प्रहरीले जनाएको छ ।
