बेपत्ता बालबालिका अझै भेटिएनन्, आज गोताखोरबाट खोजी जारी 

६ महिना अघि

उदयपुर, चैत १२

आईतबार दिउँसो होली खेलेर नुहाउँने क्रममा सुन नदीमा डुबेर बेपत्ता भएका ३ बालबालिकाको खोजी कार्य आज पनि जारी छ । आईतबार राति अवेरसम्म खोजी गर्दा नभेटिएका उनीहरुको खाजीमा सोमबार विहानदेखि गोताखोर परिचालन गरेर खोजी गरिदैछ । 

उदयपुर र खोटाङबीचको धाब्लाङस्थित सुन नदीमा नुहाउन गएका बेला डुबेर बेपत्ता भएका त्रियुगा नगरपालिका १४ साउनेकी १२ वर्षीया रेखा मगर, १२ वर्षकै लोकबहादुर मगर र ९ वर्षीय रिदम मगर बेपत्ता भएका थिए । 

होली खेलेर घरदेखि ६ किलोमिटर तल धाब्लाङस्थित सुन नदीमा नुहाउन गएका उनीहरु पौडी खेल्दाखेल्दै डुबेपछि तत्काल उद्धारका स्थानीयवासी, प्रहरी र सशस्त्र प्रहरी बल ५ नं. हेडक्वाटर त्रियुगाको उद्धार टोलीले खटेका थिए । ‘आईतबार रातिसम्म टर्च बालेर खोज्ने काम भयो’ त्रियुगा १४ का वडाध्यक्ष मगरले भने ‘हिजो नभेटिएपछि आज विहानैदेखि खोजी कार्य जारी  छ । घट्नास्थलभन्दा १ किलोमिटर तलसम्म खोज्दा नभेटेपछि आज तालिम प्राप्त गोताखोरले खोजी गरिरहेको छ ।’

एकै ठाउँको वल्ला घर पल्ला घरका ३ बालबालिका होलीकै दिन बेपत्ता भएपछि परिवारसँगै सिङ्गो साउने बजारवासी स्तभ्ध भएका छन् । हरेक वर्षको होलीमा रङ खेल्दै रमाउँने बजारमा यो घट्नाले अहिले सन्नाटा छाएको छ । पुरै गाउँले बेपत्ता बालबालिकाको खोजीमा नदी किनारमा भेला भएका छन् । डुबेको १८ घण्टासम्म नभेटिएपछि उनीहरु फेला पर्ने संभावना धेरै कम भएको उद्धार टोलीमा खट्ने प्रहरीको अनुमानज छ । 

जिल्ला प्रहरी कार्यालय उदयपुरका सूचना अधिकारी डिएसपी हरिनन्दन चौधरीले हराएका बालबालिकाको खोजी कार्य सोमबार पनि जारी रहेको बताए । उनले अघिल्लो दिन छिट्टै रात परेकाले सोमबार विहानैदेखि खोजी गर्न थालेको तर, अहिलेसम्म पत्ता नलागेको बताएका छन् । केहीदिनअघि सुरु भएको वर्षा आईतबार विहानसम्म निरन्तर भईरहेकाले नदीमा पानीको सतह बढेकाले खोजी कार्यमा तालिम प्राप्त जनशक्ति खटाइएको पनि उनले बताए । 

घट्नास्थल धाब्लाङमा ७ वर्षअघि सिल्यान्यास भए पनि निर्माण कार्य अघि नबढेर अलपत्र परेको मोटरेबल पुल निर्माण सुचारु गर्न नदीको पानी डोल्याइएको छ । पहिलेको वेल (गोलो खम्बा) डिजाईनको फाउण्डेसनबाट पुल नबन्ने भएपछि पाईल (चेप्टो खम्बा) डिजाईनको फाउण्डेसन गाड्ने काम भईरहेको छ । त्यसका लागि नदीको माटो खनेर पानी एकतर्फी डोल्याउँदा गहिरो दह बन्न पुगेको ठाउँमा पौडी खेल्न जाँदा बालबालिका डुबेको प्रहरी अनुमान छ । 

पहिला सामान्य पानी रहेको नदी किनारको माटो खनेर पानी डोल्याउन बीचतिर लगेकाले अहिले किनारमै गहिरो तलाउ बन्न पुगेको बालबालिकालाई हेक्का हुन नसक्दा दुर्घटना भएको आँकलन प्रहरीको छ । स्थानीयले पनि एकातिर किनारमै गहिरो तलाउ र अर्कातिर निरन्तर वर्षाले पानीको वहाव बढेकाले बालबालिका डुबेर दुर्घटना भएको अनुमान गरेका छन् ।