पहिलो चरणको दादुरा–रुबेला खोप शतप्रतिशत

८ महिना अघि

उदयपुर, फागुन २१

फागुन १३ गतेदेखि सुरु भएको पहिलो चरणको ‘दादुरा–रुबेलाविरुद्धको खोप अभियान’मा झण्डै २४ हजार बालबालिका लाभान्वित भएका छन् । गत १३ देखि १७ गतेसम्म सञ्चालित पहिलो चरणको खोप अभियान सतप्रतिशत सफल भएको जिल्ला स्वास्य कार्यालय उदयपुरले जनाएको छ । 

पहिलो चरणमा जिल्लाका त्रियुगा, चौदण्डीगढी र बेलका नगरपालिका तथा रौतामाई र लिमचुङबुङ गाउँपालिका गरी ५ वटा स्थानीयतमा खोप अभियान चलाइएको थियो । सो अभियान अन्तर्गत सतप्रतिशत प्रगति भएको स्वास्थ्यले जनाएको छ । त्रियुगाका १६ वडाका ६ हजार ६ सय ८४ जनालाई लक्षित गरिएकोमा ११०.४७ प्रतिशत प्रगति भएर ७ हजार ६ सय ५ जनाले खोप पाएका छन् भने चौदण्डीगढीमा १० वडाका ३ हजार ५ सय ५५ जनालाई लक्षमध्ये ९०.४६ प्रतिशत प्रगति गर्दै ३ हजार २ सय १६ ले पाएका छन् ।

त्यस्तै बेलकामा ३ हजार ५ सय ११ को लक्ष्य लिइएकोमा ३ हजार ३ सय १४ अर्थात ९४.३८ प्रतिशत बालबालिकालाई खोप दिइएको स्वास्थ्य कार्यालयका सुपरभाईजर सुबास निरौलाले बताए । उनका अनुसार गाउपालिकातर्फ रौतामाईमा १ हजार ४ सय ७३ लाई खोप दिने लक्ष्य लिइएकोमा १ हजार ३ सय ६८ अर्थात ९२.७४ ले पाएका छन् भने लिमचुङबुङमा ६ सय ९५ लाई लक्षित गरिएकोमा ६ सय २४ अर्थात ८७.७८ प्रतिशतले खोप हानेको सुपरभाईजर निरौलाले बताए । 

सपरभाईजर त्रियुगामा लक्ष्यभन्दा बढी ११०.४७ प्रतिशतले खोप हान्नुको कारण चाँहि सदरमुकाम भएकाले अन्य स्थानीयतहका बालबालिका बसोबास गरेकाले हो । पहिलो चरणमा स्वास्थ्य कार्यालयले २३ हजार ५ सय २२ जना बालबालिकालाई खोप दिने लक्ष्य लिएकोमा पूर्णरुपमा सफल भएको दावी कार्यालयले गरेको छ । दोस्रो चरणको खोप अभियान आउँदो २२ गतेदेखि २७ सम्म सञ्चालन हुनेछ । दोस्रो चरणमा जिल्लाका कटारी नगरपालिका तथा उदयपुरगढी र ताप्ली गाउँपालिकाका ६ हजार ९ सय १६ लाई खोप दिइने कार्यक्रम छ । 

कटारीका १४ वडाका ४ हजार ८६, उदयपुरढीका ८ वडाका २ हजार १ सय २८ र ताप्लीका ५ वडाका ८ सय ७० बालबालिकालाई खोपको लक्षित वर्गभित्र राखिएको छ । ५ स्थानीयतहका ५१ वडामा खोप अभियान उत्साहजनक रुपमा सम्पन्न भएको र बाँकी ३ स्थानीयतहका २४ वडामा पनि उसैगरी सफल बनाउने गरी स्वास्थ्यकर्मी परिचालन गरिएको उनले बताए । 

स्वास्थ्य कार्यालय प्रमुख बृजकुमार दासका अनुसार यसवर्षको खोप अभियानमा जिल्लाभरी ४ सय ६४ स्वास्थ्यकर्मी परिचालन गरिएको छ भने ९ सय २८ जना स्वयंसेवक परिचालन भएका छन् । खो सञ्चालनको अनुगमन गर्न जिल्लाभरी ५ जना चिकितसकसहितको टोली परिचालन गरिएको छ । यो वर्ष देशभरका ९ देखि ५९ महिनासम्मका र ५ देखि १५ वर्षसम्मका बालबालिकालाई दादुरा–रुबेलाविरुद्धको खोप दिने अभियान चलिरहेको छ । 

उदयपुरको हकमा भने ९ देखि ५९ महिनासम्मका बालबालिकालाई मात्र खोप दिने कार्यक्रम रहेको प्रमुख दासले बताए ।