१
२0८0 फाल्गुन १८ शुक्रबार
कटारी, फागुन १८
शुक्रबार दिउसो कटारीमा भएको बोलेरो दुर्घटनामा परी ७० वर्षीय बृद्धको निधन भएको छ । चालकसहित १५ जना घाईते भएकोमा ४ जनाको अवस्था गम्भीर छ ।
कटारी बजारदेखि सिरिसेतर्फ गईरहेको ना १ ज ८३३३ नं. को बोलेरो दिउँसो ४ः२० बजे कटारी ७ मर्जेटपुर–गोठडाँडाको भित्री सडकमा बे्रक फेल भई दुर्घटना हुँदा कटारी ८ सिरिसेका ७० वर्षीय वीरबहादुर तामाङको निधन भएको इलाका प्रहरी कार्यालय कटारीले जनाएको छ ।
इप्रका प्रमुख डिएसपी सुवास राईका अनुसार सडकबाट १ सय ५० मिटर तल खसेर दुर्घटना भएको बोलेरोमा ४ पुरुषसहित १५ यात्रु घाईते भएका छन् । दुर्घटनालगत्तै इप्रकाबाट खटेको डिएसपी राई नेतृत्वको १० जनाको टोलीले घाईतेहरुको उद्धार गरी कटारी अस्पताल ल्याएकोमा तामाङलाई डा.ले मृत घोषित गरेका थिए ।
घाईतेमध्ये गम्भीरहरु कटारी ८ की ३५ वर्षीया भद्रीमाया मगर, ६० वर्षीया खड्कीमाया मगर, २८ वर्षीया तारा मगर, ३३ वर्षीया कुमारी तामाङलाई बिराटनगर रिफर गरिएको छ ।
अन्य घाईतेहरुमा चालक कटारी ८ सिरिसेकै ३३ वर्षीय कर्मासिंह तामाङ, सोही वडा थलियाकी ३० वर्षीया गीता तामाङ, ६० वर्षीय तेतु थापामगर, २३ वर्षीया अस्मिता मगर, ५५ वर्षीया रिकीमाया मगर, ६१ वर्षीय धनबहादुर मगर रहेका छन् ।
त्यसैगरी कटारी ८ कै २४ वर्षीया मनकुमारी मगर, २८ वर्षीय दिपबहादुर तामाङ, कटारी ७ बिहीवारेकी २५ वर्षीया अस्मिता दनुवार र सोही वडाका ४५ वर्षीय होमबहादुर मगर घाईते रहेका छन् ।
जिल्ला प्रहरी कार्यालय उदयपुरका प्रवक्ता डिएसपी हरिनन्दन चौधरीले सामान्य घाईतेहरु सबैको कटारी अस्पतालमै उपचार भईरहेको बताएका छन् ।
