बाणिज्य संघले दियो पूर्व अध्यक्ष गुप्ता परिवारलाई राहत

९ महिना अघि

उदयपुर, फागुन ११

त्रियुगा उद्योग बाणिज्य संघ गाईघाटले पूर्व अध्यक्ष स्वर्गीय रामचन्द्र गुप्ताको परिवारलाई राहत प्रदान गरेको छ । सातादिनअघि दिवंगत गाईघाटका स्थायी बासिन्दा गुप्ताको परिवारलाई संघले नगद २५ हजार राहत उपलब्ध गराएको हो । 

सदरमुकाम गाईघाटमा जारी ‘दोस्रो प्रदेश महोत्सव ०८०, त्रियुगा’को अवसरमा आयोजित सांस्कृतिक कार्यक्रमका बीच बुधबार साँझ संघका अध्यक्ष रमेश रसाईलीलगायत पदाधिकारीले गुप्ताको परिवारलाई राहतवापतको चेक हस्तान्तरण गरे । पूर्व अध्यक्ष गुप्ताले उदयपुरका व्यापारी व्यवसायीहरुको हकहितका लागि गठित त्रियुगा उद्योग बाणिज्य संघको चुरुवाती चरणमा दुई कार्यकाल अध्यक्ष भएर नेतृत्वदायी भूमिका खेलेका थिए । 

त्यसैगरी सोही अवसरमा संघले अग्निपीडित स्थानीय व्यापारीहरुलाई पनि राहत वितरण गरेको छ । गत मंसिर २४ गते भएको गाईघाट ब जारमा भएको आगलागीमा परी धनमाल क्षति बेहोरेका महालक्ष्मी रिपेरिङ सेन्टरकी सञ्चालिका निशा ठाकुर र राज अटो सेन्टरका सञ्चालक राजु ठाकुरलाई जनही ११ हजार नगद प्रदान गरियो । 

त्रियुगा उद्योग बाणिज्य संघले यस्तो राहत वितरणको कार्यक्रम यसैवर्षदेखि सुरुवत गरेको हो । संघको साधारणसभाको निर्णय अनुसार पहिलो पटक यो राहत प्रदान गरिएको अध्यक्ष रसाईलीले बताए । उनका अनुसार मृतक संघका पूर्व वा बहालवाला पदाधिकारी तथा सदस्यहरुलाई न्यूनतम २५ हजार र भैपरी वा विपतमा परेकालाई न्यूनतम १० हजार राहत प्रदान गर्ने निर्णय भएको छ । सो निर्णय कार्यान्वयनको सुरुवात गर्दे सो राहत रकम वितरण गरिएको हो । 

संघले गत १ गतेदेखि गाईघाटमा प्रदेशस्तरीय महोत्सव सञ्चालन गरिरहेको छ । ११ गतेसम्म सञ्चालन हुने महोत्सवमा घरेलु उद्यम, कृषि उपजजस्ता स्थानीय उत्पादनदेखि अटो बजार हुँदै वहुराष्ट्रिय कम्पनीका उत्पादनसम्मका सामग्री प्रदर्शनी तथा विक्री वितरण गर्त राखिएको छ । संघका महासचिव दिनेश श्रेष्ठका अुनसार २ सय ५० स्टल रहेको महोत्सवमा हरेक साँझ ख्यातिप्राप्त राष्ट्रिय कलाकारहरुको प्रस्तुति दिदै आएका छन् । 

जस अनुसार अघिल्लो दिन चर्चित नृत्यंगना प्रिती पासवान र गायिका अस्मीता अधिकारीले प्रस्तुति दिए । बिहीबारको कार्यक्रम चर्चित गायिका कला राईले प्रस्तुति दिनेछन् । यसअघि हाँँस्य व्यंग्य कलाकार मनोज गजुरेल, पप गायक सविन राई, सृजना खत्रीलगायत दर्जन कलाकारको प्रस्तुति दिने काम सकिइसकेको छ । अन्तिम दिन ११ गते साँझ चर्चित गायक राजेशपायल राई (राई इज किङ) को एकल प्रस्तुति हुने आयोजक संघका उपाध्यक्ष सरोज बस्नेतले बताए । 

महोत्सवले उदयपुरको खस्कदो व्यापार व्यवसायलाई बढावा दिदै अर्थतन्त्र चलायमान बनाउन मद्धत गर्ने संघका पूर्व उपाध्यक्ष भरत चामलिङले बताए । पूर्व महासचिव गोपाल श्रेष्ठले कोविडका कारण उठ्नै नसक्ने अवस्थामा पुगेको व्यापार व्यवसायलाई यो महोत्सवले गति दिने अपेक्षा गरिएको बताए ।