हर्देनीका अग्निपीडितलाई रेडक्रसको राहत 

८ महिना अघि

उदयपुर, पुस २१

उदयपुरको कटारी नगरपालिका ११ हर्देनीमा आगलागीमा परेका रुद्रबहादुर विश्वकर्मा परिवारलाई नेपाल रेडक्रस सोसाईटी उपशाखा कटारीले राहत उपलब्ध गराएको छ । बिहीबार साँझ विद्युत सट भएर आगलागी हुँदा घर जलेर खुल्ला आकाशमुनि पुगेका विक परिवारलाई शुक्रबार रेडक्रसले राहत उपलब्ध गराएको हो । 

चिसो चरम बढेको बेला भएको आगलागीबाट घरसहित सबै जलेर पीडित भएको विक परिवारलाई कटारी नगरस्तरीय रेडक्रस उपशाखा अध्यक्ष राजिव तामाङ नेतृत्वको टोली घरमै पुगेर प्रारम्भिक राहत हस्तान्तरण गरेको हो । उपशाखाका सचिव इश्वर पोखरेलका अनुसार उपशाखा अध्यक्ष तामाङ, उपाध्यक्ष राजकुमार थापा, कोषाध्यक्ष प्रमिला कार्की, उपसचिव दिनेश पुरी, सदस्य तिलक कटुवाल र राजकुमार बुढाथोकीले जनही ५ सयका दरले चन्दा संकलन गरेर परिवारलाई हस्तान्तरण समेत गरेको छ । 

उता कटारी नगरपालिकाले पनि राहत वितरण गरेको छ । नगरप्रमुख राजेशचन्द्र श्रेष्ठले, उपप्रमुख गीता खड्का, इलाका प्रहरी कार्यालय कटारीका प्रमुख डिएसपी सुभास राई, कटारी ११ का वडाध्यक्ष अनन्त हायु, ३ का वडाध्यक्ष पुस्कर खडका र ७ का वडाध्यक्ष सुबिन ढुंगानासहितको टोली विकको घरै पुगेर राहत वितरण गरेको हो । मेयर श्रेष्ठले तत्काललाई केही राहत दिइएको र थप सहयोग पनि गर्ने बताए । 

विद्युत सट भएर लागेको आगोले विको ढुंगा माटोले बनेको दुईतले घर र घरमा राखिएका अन्नपात, लत्ताकपडा, भाँडाकुँडा, सुनचाँदी, कागजात र नगद सबै जल्नुका साथै श्रीमतिसमेत घाईते भएकी छिन् । घर आगलागी भएको देखेर सामान निकाल्न खोज्दा बिककी श्रीमति ३५ वर्षीया मीना विक घार्ईते भएकी छिन् । मीनालाई शुक्रबार विहान कटारी अस्पताल ल्याएर उपचार भईरहेको छ । डा.गौरव साहका अनुसार हात र खुट्टा जलेर घाईते उनी सामान्य र खतरामुक्त रहेकी छिन् । 

आगलागीबाट बिकको घर र घरमित्रका धनमाल पूर्णरुपमा जलेर २० लाखभन्दा बढी मूल्य बराबरको क्षति पुगेको प्रारम्भिक अनुमान प्रहरीले गरेको छ । स्थानीय प्रहरी चौकी र इलाका प्रहरी कार्यालय कटारीबाट गएको टोलले गाउँलेहरुको सहयोगमा २ घण्टापछि आगो नियण्न्त्रणमा लिइएको प्रहरीले जनाएको छ । 

गाउँगाउँमा रेडक्रस बनाउने अभियान

उदयपुर रेडक्रसले केही समययता जिल्लाका सबै स्थानीयतहमा उपशाखा गठन गर्ने काम गरिरहेको छ । स्थानीयतहमा आईपर्ने बिपत व्यवस्थापनको उद्धार र राहत वितरणका लागि स्थानीयतकै उपशाखा रेडक्रसले सहयोग गरोस् भन्ने उदेश्यले सबै पालिकाहरुमा उपशखा गडन गर्ने काम गरिरहेको रेडक्रस शाखा उदयपुरका सभापति मदनराज कटुवालले बताए । जस अनुसार जिल्लाका ८ वटै स्थानीयतहमा उपशाखा गठन गर्ने क्रम चलिरहेको सभापति कटुवालले बताए । जसमध्ये ३ नगर र २ गाउँपालिकामा उपशाखा गठन भएर पनि कार्यान्वयनमा आईसकेको कटुवालको भनाई छ । 

कटुवालका अनुसार अहिलेसम्म त्रियुगा, चौदण्डीगढी र कटारी नगर तथा उदयपुरगढी र रौतामाई गाउँपालिकामा उपशाखा गठन भएर सञ्चालनमा आईसकेको छ । अव बेलका नगरपालिका र ताप्ली तथा लिमचुङबुङ गाउँपालिकास्तरीय उपशाखा गठनको तयारी पनि अन्तिम चरणमा पुगेको छ । 

सभापति कटुवालले यही पुसभित्रै बाँकी तीनवटै स्थानीयतहमा उपशाखा गठन गरेर क्रियासिल बनाउने योजना शाखाले लिएको बताएका छन् । सभापति कटुवालले स्थानीयतहमा भएका बिपतका घट्नाको उद्धार, व्यवस्थापन र राहत लिन पीडितहरु सदरमुकामसम्म धाउन नपर्ने वातावरण बनाउन स्थानीयस्तरमै उपशाखा गठन गरेर रेडक्रसकर्मीहरुलाई परिचालन गर्ने योजना बनाइएको बताएका छन् ।