८ महिना अघि
२0८0 पुष २0 शुक्रबार
गाईघाट, पुस २०
सदरमुकाम त्रियुगा नगरपालिका ११ गाईघाट पिजीचोकमा शुक्रबार विहान भएको मोटरसाईकल दुर्घटनामा परी एक युवकको निधन भएको छ भने अर्का एक गम्भीर घाईते भएका छन् ।
विहान १ः३० बजे पिजीचोकस्थित मदन भण्डारी लोकमार्गमा पूर्वतर्फ गईरहेको प्र १–०५–००१ प ७४३० नं. को मोटरसाईकल दुर्घटना हुँदा त्यसमा सवार २ युवकमध्ये मनोज चौधरीको निधन भएको प्रहरीले जनाएको छ ।
ट्राफिक कार्याल्य उदयपुरका अनुसार आफै अनियन्त्रित भई सडकको बायाँतर्फको सिमेन्ट रेलिङमा ठोक्किएर दुर्घटना हुँदा मोटरसाईकलमा सवार दुवैजना गम्भीर घाईते भएका थिए । दुवैलाई उद्धार गरी उपचारार्थ जिल्ला अस्पताल लगिएकोमा त्रियुगा ११ मुख्यचोकका २२ वर्षीय मनोज चौधरीको उपचारको क्रममा निधन भएको हो ।
अर्का घाईते २२ वर्षकै ज्ञानेन्द्र मलाहा गम्भीर बिरामी छन् । उनलाई बिराटनगर रिफर गरिएको जिल्ला ट्राफिक प्रहरी प्रमुख वरिष्ट नायव निरीक्षक (वसई) लोकबहादुर दियालीले बताए । वसई दियालीका अनुसार अहिले घट्नास्थलको सर्जमिन मुचुल्का बनाउने काम भईरहेको छ भने त्यसपछि मृतकको लास पोष्टमार्टमको प्रक्रिया अघि बढाइनेछ ।
मस्त निन्द्रामा रहेका स्थानीयलाई व्युँताउने गरी ठूलो आवाज आएको सुनेर सडकमा निस्केर हेर्दा दुर्घटनामा परेको मोटरसाईकल र दुई व्यक्ति सडकमा लडिरहेको देखेर प्रहरीलाई खवर गरेका थिए । दुर्घटनास्थलमै घर भएका स्थानीय मोहनसिंह तामाङका अनुसार रेडिङमा ठोक्किएको मोटरसाईकलको भाईजर र हेल्मेटका टुक्रा १ सय मिटर परसम्म उछिटिएको हुनाले बाईक तिब्रगतिमा हाँकेको अनुमान गर्न सकिने तामाङले बताए ।
युवकद्वय कता किन जाँदैथिए भन्ने केही खुलेको छैन । मोटरसाईकल पनि कसले चलाएको भन्ने अहिले नखुलिसकेको वसई दियालीले बताए । घट्नाबारे थप अनुसन्धान भईरहेको प्रहरीले जनाएको छ ।
