मेयर रनिङ सिल्ड त्रियुगा माविको कब्जामा 

८ महिना अघि

उदयपुर, पुस १४

त्रियुगा नगरपालिकामा सम्पन्न ‘दोस्रो त्रियुगा अन्तर विद्यालयस्तरीय मेयर रनिङ सिल्ड प्रतियोगिता ०८०’ त्रियुगा नमूना मावि गाईघाटले जितेको छ । गत बुधबार सुरु भएर शनिबार सम्पन्न प्रतियोगितामा एथ्लेटिक्सतर्फ ८ इभेन्ट, भलिबलतर्फ पुरुष महिला दुवै र कबडीमा महिलातर्फ प्रथम हुँदै ३ सय १५ अंकका साथ त्रियुुगाले वर्चश्व कायम गरेको हो । 

कबडीमा प्रथम, एथ्लेटिक्समा ४ इभेन्टमा प्रथम र भलिबलतर्फ दुवै टिममा दोस्रो स्थानी लिदै उपविजेता बन्न पुगेको रामजानकी मावि मोतिगडा १ सय ५ अंक बटुल्न सफल भएको छ । आयोजक त्रियुगा नगर युवा तथा खेलकुद विकास समितिका अध्यक्ष विजयसिंह दनुवारका अनुसार प्याराडाईज मावि गाईघाट ८३ अंक ल्याउँदै तेस्रो भएको छ । एथ्लेटिक्समा ५ हजार र १५ सय मिटर दौडमा पहिलो भएको प्याराडाईजले अन्यमा मिश्रित जित पनि प्राप्त गरेको छ ।

त्रियुगा नगरपालिका १३ हवाईफिल्डस्थित थरुहट उदयपुर रंगशालामा सम्पन्न प्रतियोगितामा भलिबलमा महिलातर्फ ११ र पुरुषतर्फ १४ विद्यालयको सहभागिता थियो । नगरपालिकाका १६ वटै वडाका ० देखि १२ कक्षासम्म सञ्चालित सामुदायिक तथा संस्थागत (नीजि) गरी ३२ विद्यालयका छात्रछात्राले भाग लिएको प्रतियोगितामा भलिबलसहित कराते, तेक्वान्दो, कबडी र एथ्लेटिक्स गरी ५ बिधामा स्पर्धा गराइएको थियो । 

एथ्लेटिक्समा ५ हजार मिटर, १५ सय, ८ सय, ४ सय मिटर, २ सय र १ सय मिटर दौडमा पुरष तथा महिला दुवैतर्फ प्रतिस्पर्धा गराइएको थियो । त्यस्तै सटफुट, हाईजम्प, लङजम्प र ज्यावलिङथ्रोमा पनि स्पर्धा गराइएको थियो । नगरपालिका स्थानीय शिक्षा अधिकारी शिवकुमार राउतका अनुसार १६ वटै वडाका माध्यमिकस्तरमा अध्ययनरत विद्यार्थीहरुको सहभागिता रहेको प्रतियोगितामा कुनै न कुनै स्थान सबैले प्राप्त गरेका छन् । 

विद्यार्थीहरुलाई अतिरिक्त क्रियाकलापमार्फत बाहिरी ज्ञान दिलाउदै स्वास्थ्य स्फुर्ति र अनुशासनका लागि खेलकुद कार्यक्रम अन्तर्गत वर्षेनी मेयर रनिङ सिल्ड प्रतियोगिता आयोजना गर्दै आएको स्थाशिअ राउतले बताईन् । विजेता विद्यालयले प्रदेशस्तरीय रनिङ सिल्ड प्रतियोगितामा भाग लिन पाउने उनको भनाई छ ।

यसवर्ष सिल्ड जित्ने त्रियुगा नमूना मावि गतवर्ष पनि सिल्डसहित बहुबिधामा जितेको थियो ।  विद्यालय व्यवस्थापन समितिका अध्यक्ष बिनोद पाण्डेले आगामी वर्षको रनिङ सिल्ड पनि जितेमा सिल्ड पच गर्ने बताए । अध्यक्ष पाण्डेले सामुदायिक विद्यालयहरु गुणस्तरीय शिक्षा र खेलकुदमा पनि उत्तिकै सबल छन् भन्ने कुराको प्रमाणित गेरर देखाउन त्रियुगा मावि सफल भएको बताए । 

‘हामी गतवर्षको रनिङ सिल्ड पनि जित्न सफल भएका थियौँ, यसपालि पनि जित्यौँ’ अध्यक्ष पाण्डेले भने ‘यसको अर्थ सामुदायिक विद्यालयहरु कुनै कुरामा कमजोर छैनन् भन्ने त्रियुगा नमूना माविले सावित गरेको छ ।’ 

प्रधानाध्यापक सुभाष विष्टका अनुसार यसवर्षको प्रतियोगितामा एथ्लेटिक्समा ८  विद्यार्थी प्रथम हुन सफल भएका छन् भने भलिबलतर्फ महिला पुरुष दुवै टिम र कबडीमा महिला टिम प्रथम भएको छ । प्रअ विष्टले १५ सय मिटरमा यमुना परियार, ४ सय मिटर रिले दौडमा सरोज खत्री, र ४ सय मिटर फाईनलमा सन्तोष राई, ४ सय मिटर महिला रिलेमा चुधमाया बस्नेत र २ सय मिटर फाईनलमा अनिश चौधरी प्रथम भएको बताए । त्यसैगरी हाईजम्पमा सुजन तामाङ र लङजम्पमा अनिश चौधरी प्रथम भ्ए भने जानुका श्रेष्ठ त्रिपलजम्पमा प्रथम भईन् ।

समापन कार्यक्रममा त्रियुगा नगरप्रमुख बसन्त बस्नेत, उपप्रमुख महेश्वरी राई र खेलकुद विकास समिति अध्यक्ष विजयसिंह दनुवारले विजेता विद्यालय र खेलाडीहरुलाई सिल्ड, पुरस्कार तथा प्रमाणपत्र प्रदान गरे ।