रौता पोखरीमा प्रहरी चौकी स्थापना

११ महिना अघि

महेश्वर चामलिङ

रौता पोखरी, मंसिर २० 

केही समययता आन्तरिक पर्यटकको आकर्षण बन्दै गएको रौता पोखरीमा सुरक्षा व्यवस्थापन गर्न प्रहरी चौकी स्थापना गरिएको छ । उदयपुर मात्र नभई प्रदेश १ कै पर्यटन विकासको प्रचुर संभावना बोकेको रौता पाखेरीक्षेत्रको सुरक्षा र दीगो व्यवस्थापनका लागि प्रहरी चौकी स्थापना गरी सञ्चालनमा ल्याइएको हो ।

बुधबार एक कार्यक्रमका बीच गाउँपालिका अध्यक्ष वीरेन्द्रकुमार मगर र प्रमुख जिल्ला अधिकारी जनार्दन गौतमले प्रहरी चौकीको संयुक्त रुपमा उद्घाटन गरे । जिल्ला प्रहरी प्रमुख एसपी रमेश थापा, डिएसपी हरिनन्दन चौधरी, राष्ट्रिय अनुसन्धान निर्देशक र नेपाली सेनाका प्रतिनिधि तथा जनप्रतिनिधिहरुको उपस्थितिमा चौकी उद्घाटन गरिएको हो । 

चौकीको कमाण्ड तत्काललाई हवल्दार नेतृत्वमा ५ सदस्यीय टोली परिचालन गरिएको अध्यक्ष मगरले बताए । उनका अनुसार तत्कालाई हवल्दार अम्बिका भट्टराईको कमाण्डमा ५ जना प्रहरी टोली राखेर अस्थायी प्रहरी पोष्ट सञ्चालनमा ल्याइएको र छिट्टै चौकीमा रुपान्तरण गरी प्रहरी सहायक निरीक्षक (असई)को कमाण्डमा ९ जना प्रहरी राख्ने गरी स्तरोन्नति गरिने छ । 

पोखरी नजिकै रहेको पुरानो ४ कोठे स्वास्थ्य भवनमा स्थापना गरिएको चौकीका लागि छिट्टै नयाँ भवन बनाउन आवश्यक स्रोतको खोजी गरिरहेको पनि अध्यक्ष मगरले बताए । सकेसम्म चालु वर्षँभित्रै नत्र आगामी वर्षभित्र सुविधा सम्पन्न भवन बनाएर प्रहरी चौकीलाई व्यवस्थित बनाउने लक्ष्य गाउँपालिकाले लिएको र त्यसका लागि आवश्यक स्रोतको खोजी गर्न स्थानीय सरकारले संघ र प्रदेश सरकारसँग समन्वय गर्ने प्रतिबद्धता पनि अध्यक्ष मगरले जनाए । 

समग्र रौता पोखरीको पर्यटन विकास, प्रबद्र्धन र व्यवस्थापनका लागि प्रहरी चौकीलाई भवन र सवारी साधनलगायत आवश्यक भौतिक पूर्वाधार र यन्त्र उपकरणको जोहो गर्ने प्रतिबद्धता पनि उनले जाहेर गरेका छन् । स्थानीयतहबाट केही बजेट बिनियोजन गरी प्रदेश र संघीय सरकासँग साथ लिएर चौकीलाई व्यवस्थपन गरिने उनको भनाई छ । 

रौतामाई गाउँपालिका ६ मा पर्ने रौता पोखरी १ नं. प्रदेशका १४ वटै जिल्लाका पर्यटकीय संभावना बोक्ने गन्तव्यमध्ये अति संभावनायुक्त रहेको छ । रौता पोखरी पर्यटकीय मात्र नभएर धार्मिक तथा ऐतिहासिक अर्थमा पनि उत्तिकै महत्व बोकेको स्थल भएको रौतामाई ६ का वडाध्यक्ष पृथ्वी राईले ेबताए । उनका अनुसार घुमफिर गर्न, पुनरताजगी लिन, पुजा आराधना र भक्तिभाव गर्न पनि रौता पोखरीमा आन्तरिक पर्यटक र भक्तजनको घुईचो लाग्ने गरेको छ । 

गाउँपालिकाका प्रमुख प्रशासकीय अधिकृत जनक बस्नेतका अनुसार सदरमुकाम गाईघाटदेखि ४९ किलोमिटर उत्तरमा पर्ने रौता पाखेरी समुद्री सतहदेखि १ हजार ९ सय मिटरको उचाईमा अवस्थित छ । यहाँ चिसो हावापानी, सुन्दर र मनोरम जंगलको बीचमा बाह्रैमास पानी जमिरहने सफा र सन्दर पोखरी रहकेो छ भने पोखरीको उत्तरतर्फ मनोरम हिमश्रृङ्खला, दक्षिण, पश्चिम र पूर्वतिर टाढाटाढाका सहर वबजार देख्न सकिन्छ । 

सुन्दर र मनोरम दृष्यास्वादन गर्न, रौतामाई मन्दिरमा पुजा आराधना गर्न र घुमफिर गर्न आउनेहरुको संख्या दिनानुदिन बढ्दै गएको हाकिम बस्नेतले बताएका छन् । आन्तरिक पर्यटक र भक्तजन तीर्थयात्रीहरुको पछिल्लो समय आकर्षणको केन्द्र बन्दै गएको उनको भनाई छ ।  

मनोरम जंगलबीचमा रहेको कन्चन पोखरी रौताको प्रमुख आकर्षण हो । पोखरी छेउमा रहेको रौतामाई मन्दिरमा पुजा आराधना गरी पाठी र परेवाको बली चढाउँदा सबैखाले मनोकामना पुरा हुने परम्परागत मान्यता रहिआएकाले यो ठाउँ धार्मिक हिसावले पनि उत्तिकै महत्वपूर्ण रहेको गाउँपालिकाका लेखा अधिकृत भुपध्जव रायमाझी बताउँछन् । 

उनका अनुसार हरेक वर्ष माघ महिनाभरी दर्शनार्थी भक्तजनको बाक्लो उपस्थिति हुने गरेको छ । भक्तजनले विशेष गरी माघभरी पुजा आराधना गर्ने गरेका छन् । अन्य महिना पनि बली दिने चलन रहेको तर, कात्तिक, पुस र चैतमा भने पुजा आराधना केही नहुने रायमाझीले बताए । 

रौता पोखरीक्षेत्रलाई पछिल्लो ५ वर्षयता गाउँपालिकाको लगानीमा बिभिन्न आकर्षणहरु थप्ने काम भईरहेको छ । पर्यटनमैत्री बनाउने उदेश्यले पोखरीक्षेत्रमा बाउण्डरी (घेराबार) लगाउने काम भईरहेको छ भने प्रत्योक ५ सय मिटरको दूरीका अलग अलग टाकुरामा आकर्षक मूर्तिहरु निर्माण गरिएको छ । किराती राजा यलम्बर, शान्तिका प्रतिक गौतम बुद्ध, दुर्गा भगवती र शिव पार्वतीको मूर्ति फरक फरक ठाउँमा स्थापना गरिएको अधिकृत रायमाझीले बताए । 

पोखरीबाट ती मुर्तिस्थलसम्म पुग्ने सिंढीसहितको फराकिलो बाटो बनाइएको छ । एउटा मुर्तिस्थलबाट अर्कोसम्म पुग्ने जैविक प्रविधिको सिंढीको दायाँबायाँ फलामे रेलिङ हालिएको छ भने पर्यटकहरुलाई थकाई मार्न, बिसाउनी र आराम गर्ने  फलामे फलैचा, पार्टी (सेड)हरु पनि निर्माण गरिएको छ । 

चालु वर्ष पनि पर्यटन शीर्षकमा रौताको विकास र प्रबद्र्धनको कार्यक्रम रहेको प्रमुख प्रशासकीय अधिकृत बस्नेतले बताए । रौता पोखरीलाई गाउँपालिकाको प्रमुख पर्यटकीय तथा धार्मिकस्थलको रुपमा विकास गर्न स्थानीय सरकारले प्रदेश र संघीय सरकारसमक्ष पनि कार्यक्रम र बजेटको माग गरेको पनि हाकिम बस्नेतले बताएका छन् ।