१० जना फरार एकैदिन पक्राउ

१

एकैदिन १० जना फरार प्रतिवादी पक्राउ

उदयपुृर, कात्तिक २३

फरार प्रतिबादीको खोजी गरी कानुनी कारबाही गर्दै बक्यौता सजाय र जरिवाना असुल गर्ने अभियानमा उदयपुर प्रहरी एकपछि अर्को गरी सफल हुँदै आएको छ । यस क्रममा लगभग दिनहुजसो फरार अभियुत्तःहरु धमाधम पक्राउ पर्न थालेका छन् ।

गएको सातादिनयता दिनहुजसो २–३ जनाका दरले पक्राउ गर्दै आएको उदयपुर प्रहरीले बुधबार एकैदिन १० जना फरार अभियुक्तलाई नियन्त्रण गर्न सफल भएको हो । बिभिन्न आपराधिक गतिबिधि गर्ने अनि अदालतले दोषी प्रमाणित गरे पनि कानुनी कारबाहीबाट बँच्न फरार हुने अभियुक्तलाई प्रहरीले खोजी गरी पक्राउ गर्ने गरेको हो । 

बुधबार पक्राउ पर्नेहरुमा बेलका नगरपालिका १ र २ वडाका रहेको उदयपुर प्रहरीले जनाएको छ । जिल्ला प्रहरी कार्यालयका सूचना अधिकारी डिएसपी हरिनन्दन चौधरीका अनुसार इलाका प्रहरी कार्यालय रामपुर ठोक्शीलाबाट खटेको टोलीले ९ वर्ष, ७ वर्ष र ५ वर्षअघिको अदालती फैसला अनुसार दोषी सावित भए पनि फरार रहेका वन मुद्धाका ६ जना र गाली वेइज्जतिका ४ अभियुक्त पक्राउ परेका हुन् । 

डिएसपी चौधरीका अनुसार अदालतले वन मुद्धाका अभियुक्तहरुबिरुद्ध ७१ र ०७३ मा फैसला गरेर दोषी करार गरे पनि उनीहरु फरार रहेकाले खोजी गर्ने क्रममा पक्राउ परेका हुन् । ०७१ जेठ २१ गतेको फैसलामा अदालतले दोषी ठहर गर्दै २ महिना २० दिन कैद तथा ४५ हजार ९६ रुपैँया जरिवानाको सजाय सुनाइएका बेलका नगरपालिका १ का गोबिन्द ठाकुर पक्राउ परेको चौधरीले बताए् । 

त्यसैगरी वन मुद्धाकै आरोप लागेर ०७३ असार १६ गतेको अदालती फैसला अनुसार दोषी प्रमाणित भएका बेलका १ का क्रमशः चन्द्रबहादुर रोक्का, बुद्धिमान तामाङ र चन्द्रबहादुर तामाङ पक्राउ परेका छन् । उनीहरुलाई अदालतले जनही २ महिना कैद सजाय सुनाएको छ । 

अदालतको सोही मितिको फैसला अनुसार १७ दिन कैद सजाय सुनाइएका बेलका १ कै महिन्द्र राई पनि पक्राउ परेका छन् भने वन मुद्धामै अर्का अभियुक्त बेलका २ कै जयप्रकाश चौधरी पक्राउ परेका छन् । राईलाई अदालतको ०७५ पुस ६ गतेको फैसला अनुसार कैद सजाय सुनाएको हो भने चौधरीलाई सोही मितिको फैसला अनुसार २९ हजार ३ सय ६२ रुपैँया जरिवाना तोकेको छ 

गाली बेइज्जती मुद्धामा अदालतबाट ०७३ चैत ५ गतेको फैलला अनुसार जरिवाना तोकिएका बेलका २ का सहदेव चौधरी, संगीता चौधरी, सरिता चौधरी र मानती चौधरी पनि पक्राउ परेका छन् । उनीरुलाई अदालतले जनही ५ सय रुपैँया जरिवाना सुनाएको छ । जिल्ला प्रहरी प्रवक्ता चौधरीका अनुसार पक्राउ सबैलाई बिहीबार जिल्ला प्रहरी कार्यालय उदयपुर ल्याई फैसला कार्यान्वयनका लागि जिल्ला अदालत उदयपुरमा बुझाइदिएको छ ।