१
२0८0 कार्तिक १९ आईतवार
गाईघाट, कात्तिक १९
त्रियुगा नगरप्रमुख बसन्तकुमार बस्नेतले अघिल्लो राति गएको भूकम्पबाट जागरकोटमा आईपरेको बिपत्तीमा सहयोग गर्न अपिल गरेका छन् । मेयर बस्नेतले आईतबार एक अपिल जारी गर्दै जाजरकोट र रुकुम पश्चिमका गएको भूकम्प पीडितको तत्काल उद्धार, उपचार र राहत व्यवस्थापन गर्न आवश्यक आर्थिक सहयोग गर्न सबैपक्षसँग आग्रह गरेका हुन् ।
भूकम्पले ठूलो जनधनको क्षति गरेको भन्दै बस्नेतले सक्दो सहयोग गर्न व्यापारी, व्यवसायी, कर्मचारी, जनप्रतिनिधि, बुद्धिजीवि, समाजसेवीदेखि आम सर्वसाधारण सबैलाई आग्रह गरेको अपिलमा उल्लेख छ । शुक्रबार मध्येराति जाजरकोट केन्द्रबिन्दु भएर गएको भूकम्पपीडितहरुलाई सक्दो छिटो सहयोग गर्न त्रियुगा नगरपालिकाको तर्फबाट उनले सम्पूर्णसँग अपिल गरेका हुन् ।
त्रियुगा नगरबासीलाई पनि पीडितलाई सहयोग गर्न राहत संकलन गरी मानवीय सेवामा योगदान पुर्याउन जारी अपिलमा सम्पुर्ण त्रियुगावासी दाजुभाइ, दिदीबहिनी, संघसंस्था, बुद्धीजीवी, शिक्षक, प्राध्यापक, कर्मचारी, पत्रकार, उद्योगी, व्यापारी, व्यसायीहरुमा अनुरोध गरिएको छ । राहत संकलन र वितरण कार्य एकद्वार प्रणालीबाट गर्ने पनि उनले अपिलमा उल्लेख गरेका छन् ।
मेयर बस्नेतले सहयोग गर्न इच्छुकहरुलाई नगरपालिकाको प्रकोप व्यबस्थापन खातामा रकम जम्मा गर्न अनुरोध गरेका छन् । ‘जाजरकोटको रामीडाँडा केन्द्रबिन्दु भएर ६.४ रेक्टरस्केलको भूकम्प ४ पटक जाँदा ठुलो धनजनको क्षति भएको कुरा सर्वविदित छ’ बस्नेतद्वारा जारी अपिलमा भनिएको छ ‘अझै क्षतिको सम्पूर्ण विवरण आउन बाँकि छ तथापि पछिल्लो विवरण अनुसार भुकम्पबाट जाजरकोट र रुकुम पश्चिमका गरी १५७ जनाको दुःखद निधन भएको र २३८ हाराहारी गम्भीर घाईते भएको अवस्था छ ।’
भूकम्पमा परी निधन हुनेहरुप्रति गहिरो श्रद्धाञ्जली व्यक्त गर्दै बस्नेतले शोकसंतप्त परिवारजनमा समबेदना व्यक्त गरेका छन् भने घाईतेहरुको शिघ्र स्वास्थ्य लाभको कामना गरेका छन् । उनले यस दुःखद घडीमा पीडित र घाईतेको उद्धार, उपचार र घरवार विहीनहरुलाई पुनर्वासको व्यवस्था गर्न ढिला नगर्न पनि नेपाल सरकारसँग आग्रह गरेका छन् । उनले उदयपुर र त्रियुगा नगरक्षेत्रबाट जे जति सहयोग र राहत संकलन हुन्छ सबै एकद्वार प्रणालीबाट प्रभावित क्षेत्रमा पुगेर हस्तान्तरण गर्ने उनले बताएका छन् ।
सहयोगदाताले त्रियुगा नगरपालिकाको राष्ट्रिय बाणिज्य बैंक, गाईघाट शाखामा रहेको त्रियुगा नगर (जी ए–७–२) प्रकोप वयवस्थापन खाता नं.ः २०९०१००३०७०२०००४ मा जम्मा गर्न अपिलमा भनिएको छ ।
