१0 महिना अघि
२0८0 कार्तिक १५ बुधबार
उदयपुर, कात्तिक १५
दसैँ मान्न आएका एक युवाको कुटपिटबाट निधन भएको छ । त्रियुगा नगरपालिका १३ खोरीयाटोलस्थित कर्णबहादुर मगरको घरमा दसैँ मान्न आएका उनकै भान्जा २७ वर्षीय सन्तोष राईको गत ८ गते राति भएको कुटपिटबाट निधन भएको हो ।
राति ११ः३० बजे मामाघरमा राई र सोही वडाको दनुवारी टोलका २६ वर्षीय डम्बरबहादुर राईबीच बिबाद हुँदा उनीमाथि कुटपिट भएको थियो । मादक पदार्थ सेवन गरेका डम्बरबहादुरको कुटाईबाट गम्भीर घाईते भएका राई विहान उठ्दा बेहोस भेटिएपछि उपचारार्थ जिल्ला अस्पताल गाईघाट लगिएको थियो ।
उनको उपचारकै क्रममा निधन भएको प्रहरीले जनाएको छ । जिल्ला प्रहरी कार्यालय उदयपुरका सूचना अधिकारी डिएसपी हरिनन्दन चौधरीका अनुसार घट्नाबारे खवर आएलगत्तै जिल्ला प्रहरी कार्यालयका प्रहरी निरीक्षक कमाण्डको टोली परिचालन गरी अभियुक्तलाई नियन्त्रणमा लिइएको छ ।
घट्नास्थलको कानुनी प्रक्रिया पुरा गरेर मृतकको शव पोष्टमार्टम गरी आफन्तलाई बुझाइएको छ भने फक्राउ राईलाई जिल्ला अदालतबाट १० दिनको म्याद थपेर अनुसन्धान भईरहेको डिएसपी चौधरीले बताएका छन् ।
