१
२0८0 आश्विन २५ बिहीबार
खोटाङ, असोज २५
खोटाङको साकेला गाउँपालिकाले चालु वर्षको प्रथम चौसिक सामाजिक सुरक्षा भत्ता वडा वडा पुगेर वितरण गरिरहेको छ । नजिकिएको दसैँ तिहारजस्ता चाडवाडलाई लक्षित गरी गाउँपालिकाले बैंकसँग सहकार्यमा हरेक वडा पुगेर भत्ता वितरण कार्य गरिरहेको हो ।
नेपाल एसबिआई बैंकमार्फत भत्ता वितरण भईरहेको साकेलामा चालु आर्थिक वर्ष २०८०र०८१ को पहिलो त्रैमासिक भत्ता मंगलबारबाट वितरण गर्न थालेको हो । पहिलो दिन २ नं. वडाको रतन्छामा भत्ता बितरण गर्न शिविर चलाइयो । सो दिन १ सय ३० जना लाभग्राहीलाई १८ लाख ४९ हजार रुपैंया भत्ता वितरण गरिएकोछ ।
त्यसैगरी बुधबार ३ नम्बर वडा कार्यालय खिदिमाबाट भत्ता वितरण गरिएको छ । शिहीबार ५ नम्बर वडा मात्तिमबिर्ता र शुक्रबार ४ नम्बर वडा कार्यालयबाट भत्ता वितरण गर्ने कार्यतालिका तय गरिएको गाउँपालिकाका सामाजिक सुरक्षा तथा पञ्जीकरण शाखा संयोजक डिएम चाम्लिङ राईले बताए ।
उनका अनुसार वडा नम्बर १ को बाँझेच्यानडाँडामा भने केही दिनपछि मात्र भत्ता वितरण गरिने छ । बैंकको सेवा लिन गाउँपालिका केन्द्र आउनुपर्ने भएकाले सहज रकम उपलबध गराउन वडावडामा भत्ता बितरण गर्न शिविर सञ्चालन गरिएको हो ।
बैंकका प्रबन्धक मेदानी रिजालले साकेलाले ०७७र०७८ को दोस्रो चौमासिकदेखि नै बैंङ्किङ प्रणालीमार्फत सामाजिक सुरक्षा भत्ता वितरण गर्दै आएको बताए । चालु आर्थिक वर्षको प्रथम त्रैमासिकसम्म आईपुग्दा १ हजार ३ सय ३२ जना लाभग्राहीले सामाजिक सुरक्षा भत्ता यो बैङ्कमार्फत बितरण उपलब्ध गराउदै आएको उनले बताए ।
चालु वर्षको यो त्रैमासिकका लागि सबै सेवाग्राहीलाई उपलबध् गराउन गाउँपालिकाबाट कूल १ करोड ३२ लाख ३० हजार ८ सय ७८ रुपैंया रकम निकासा भएको जनाइएको छ ।
