११ महिना अघि
२0८0 आश्विन २५ बिहीबार
उदयपुर, असोज २५
उदयपुरको बिकट पहाडी लिम्चुङबुङ गाउँपालिकाले सामाजिक सुरक्षा भत्ता वडावडाबाट बितरण गर्न टोली परिचालन गरेको छ । सेवाग्राहीहरुलाई गाउँघरमै सहज सुबिधा उपलब्ध गराउने उदेश्यले बिहीबारदेखि हरेक वडाबाट भत्ता बितरणको कार्यक्रम राखिएको हो ।
गाउँपालिकाले २५ गतेदेखि ३० गतेसम्म प्रत्येक वडा पुगेर भत्ता बितरण गर्ने कार्यतालिका बनाएको छ । पहिलो दिन बिहीबार विहानदेखि वडा नं. १ को बाँसबोटेमा भत्ता बितरण कार्य भईरहेको छ । गाउँपालिकाबाट खटेको कर्मचारी टोलीले वडा कार्यालय बाँसबोटेमा सेवाग्राहीलाई बोलाएर भत्ता बितरण गरिरहेको प्रमुख प्रशासकीय अधिकृत योगेन्द्रराज गुरुङले बताए ।
सबै वडामा खट्ने टोली विहान ९ः०० देखि दिउसो १ः०० बजेसम्म खटेर भत्ता बितरण गर्ने कार्यक्रम रहेको तालिका अनुसार २६ गते २ नं. वडा ताम्लिछामा भत्ता बितरण गरिनेछ । ताम्लिछास्थित महेन्द्रदीप मावि भवनमा भत्ता लिन आउन सेवाग्राहीलाई अग्रिम जानकारी गराइएको छ । त्यसपछि २९ गते ५ नं. वडाको जाँते वडा भवनमा भत्ता बितरणको कार्यक्रम छ ।
अन्तिम दिन वडा नं. ४ बलम्तामा भत्ता बितरण गरिने छ । बलम्ताको वडा कार्यालयबाटै भत्ता बितरण गर्ने गरी टोली खट्ने कर्यातालिका रहेको छ । वडा बाहिर रहेर टोलीबाट भत्ता प्राप्त गर्न असमर्थ लिमचुङबुङबासी सेवाग्राहीका लागि एसबिआई बैंकको बेलटार र लाहान शाखाबाट पनि रकम झिक्न मिल्ने गरी निकासा दिइने अधिकृत गुरुङले बताए । वडा नं. ३ बाराहाका सेवाग्राहीहरुले भने गाउँपालिका मुकाममै वडा कार्यालय रहेकाले त्यहीँबाट भत्ता लिने कार्य भईरहेको छ ।
स्थानीयतह कर्मचारीको देशव्यापी आन्दोलनका कारण भत्ता बितरणमा समस्या आउनसक्ने भएकाले सरोकारवालापक्षसँग यसअघि नै समन्वय र सहकार्य गरेर भत्ता बितरण सहज बनाइएको छ । अधिकृत गुरुङले दसैँ तिहारजस्तो महत्वपूर्ण चाडबाडमा बृद्धबृद्धा, अशक्त, अपाङ्ग र दलितहरु लक्षित बर्ग भएको सामाजिक सुरक्षा भत्ता नरोकियोस् भनेर सबैखाले बिबाद सल्टाइएको बताए ।
