१
२0८0 आश्विन १0 बुधबार
उदयपुर, असोज १०
००७ सालका प्रजातान्त्रिक क्रान्ति योद्धा स्व. नारदमुनि थुलुङ राईको स्मृतिमा उदयपुरमा बिगत ८ वर्षदेखि सञ्चालन हुँदै आएको गोल्डकप प्रतियोगिताको यसपालिको संस्करण असोज अन्तिम सातादेखि सुरु हुने भएको छ । राईको स्थायी घर चौदण्डीगढी नगरपालिका ४ बसाहामा हुने ‘नवौं नारदमुनि थुलुङ स्मृति गोल्डकप फुटबल प्रतियोगिता २०८०’ आउँदो २७ गतेदेखि सुरु हुन लागेको हो ।
बुधबार आयोजक समितिले पत्रकार सम्मेलनको आयोजना गरी प्रतियोगिताबारे जानकारी गराएको हो । आयोजक बसाहा क्लबका अध्यक्ष गौतम राईले असोज २७ देखि सुरु हुने प्रतियोगिता कात्तिक ४ गतेसम्म सञ्चालन हुने बताए । उनका अनुसार प्रतियोगिता बसाहास्थित नारदमुनि रंगशालामा सञ्चालन हुनेछ ।
विगत वर्षहरुमा जस्तै यस वर्ष पनि प्रतियोगितामा ८ वटा क्लबले सहभागिता जनाउनेछन् । सम्मेलनमा जानकारी गराइए अनुसार प्रतियोगितामा नेपालका चर्चित क्लबहरुको सहभागिता रहने छ । जस अनुसार झापाको गोर्खा बाईज, सुनसरीको एभरेष्ट क्लब, सर्लाहीको बागमती स्पोर्ट्स क्लब, सप्तरीको न्यु त्रियुगा स्पोर्ट्स क्लब, काठमाडौका एबिनिय एपसी तथा उदयपुरको कटारी एफसीले भाग लिनेछन् । घरेलु टिम बसाहा क्लबले पनि प्रतियोगितामा आयोजकको तर्फबाट सहभागिता जनाउने अध्यक्ष राईले बताए ।
उपाधि जित्ने टिमले ४ लाख १ हजार नगदका साथ रनिङ सिल्ड र ट्रफि प्राप्त गर्ने प्रतियोगितामा उपबिजेतालाई २ लाख १ हजार नगद पुरस्कार दिइने क्लबका निवर्तमान अध्यक्ष शेखर राईले बताए । उनका अनुसार प्रतियोगितामा उत्कृष्ट टिम, उत्कृष्ट खेलाडी, सर्वाधिक गोलकर्ता, गोलरक्षक, उदीयमान खेलाडीलगायत बिभिन्न बिधागत पुरस्कारसमेत बितरण गर्ने कार्यक्रम रहेको छ ।
