१
२0८0 भाद्र २२ शुक्रबार
उदयपुर, भदौ २२
केहीदिनयता उदयपुरमा प्रकोपको रुप लिदै गएको स्क्रबटाईफसले एकजनाको निधन भएको छ । अघिल्लो दिउसो सिकिस्त बिरामी भएर उदयपुर अस्पताल भनाई भएका त्रियगा नगरपालिका ९ का ४६ वर्षीय पति सदाको स्क्रबटाईफसकै कारण निधन भएको छ ।
अन्तिम अवस्थामा अस्पताल ल्याइएका सदाको स्वास्थ्य परीक्षण गर्दा स्क्रबटाईफस संक्रमणका देखिएको र उपचारकै क्रममा आकस्मिक कक्षमै राति निधन भएको जिल्ला अस्पताल प्रमुख मेडिकल सुपरिटेण्डेन्ट (मेसु) डा. ज्ञानेन्द्रकुमार झाले बताए ।
अस्पतालमा जेनेरल फिजिसिएन डा. राहुल रौनियारका अनुसार सदामा स्क्रबटाईफस संक्रमण देखिएको त्योसँगै उनको मृगौला र पिसावमा पनि संक्रमण देखिएको थियो । रोगले निकै च्यापिसकेको अवस्थामा अस्पताल ल्याएकाले उनलाई उपचारबाट बचाउन नसकिएको उनको भनाई छ ।
डा. रौनियारका अनुसार उदयपुर अस्पतालमा स्क्रबटाईफसका बिरामीको संख्या अहिले दिनानुदिन बढ्दै गएको छ । दैनिक जँचाउन आउने बिरामीमध्ये २÷४ जनामा अनिवार्य स्क्रबटाईफसको संक्रमण देखिने गरेको छ । हाल दर्जन हाराहारी बिरामी स्क्रबटाईफसकै संक्रमणका कारण बेड भर्ना गरेर उपचार भईरहेको पनि उनले बताए ।
भाईरज ज्वरोजस्तै टाउको दुख्ने, ज्वरो आउने, हात खुट्टा र शरिर दुख्नेजस्ता लक्ष्ण मिल्ने यो रोगको उपचार गर्न ढिला भए जोखिम हुने डा. रौनियार बताउँछन् । ‘स्क्रबटाईफसको सबै लक्षण भाईरज ज्वरोसँग मिल्ने भए पनि यसले अन्य अंगहरुमा पनि आक्रमण गर्ने भएकाले निकै जोखिमपूर्ण छ’ डा. रौनियारले भने ‘यसले टाउको, मुटु, मृगौला र अन्य जुनसुकै अंगहरुमा आक्रमण गर्ने भएकाले बेलैमा उपचार गर्नुपर्छ ।’
तत्काल उपचार गराई हालेमा त्यत्ति जोखिमपूर्ण नहुने यो रोगलाई लापरबाही गरेमा भने ज्यानसम्म जानसक्ने खतरा हुने उनले बताए । रौनियारका अनुसार समयमै उपचार पाए ३ देखि ५ दिनभित्र निको हुन्छ । हिलेसम्म अस्पतालले ५०÷६० जनालाई उपचार गरेर डिस्चार्ज गरिसकेको पनि उनले बताए ।
गएको साउन सुरुतिर देखा परेको स्क्रबटाईफस संक्रमण दिनदिनै बढ्दै गएको अस्पतालकी स्टाफ नर्स छबित्रा राईले बताईन् । हालसम्म अस्पताल आउने प्राय बिरामीमध्ये २÷४ जनामा यसको संक्रमण देखिने गरेको वार्ड ईन्चार्जसमेत रहेकी राईका अनुसार हालसम्म ५ दर्जन बढी बिरामी निको भएर घर फर्किसकेका छन् । दर्जन हाराहारी भने अहिले पनि वार्ड भर्ना गरेर उपचार गराईरहेका छन् ।
