१
२0८0 असार १६ शनिबार
उदयपुर, असार १६
गाईघाटमा सम्पन्न ‘लालशेर राई स्मृति २३ औँ मेयरकप फुटबल प्रतियोगिता २०८०’ त्रियुगा नगरपालिका ११ गाईघाटले जितेको छ । शनिबार भएको फाईनलमा गाईघाटले वडा नं. २ खैजनपुरलाई ५–१ गोलले हराउँदै उपाधि जितेको हो ।
गाईघाट खेलाडी सुनिल खड्का एक्लैले ह्याट्रिक गरे भने अन्य खेलाडीहरु सरोज राउत र दिवश श्रेष्ठले २ गोल थपेका थिए । खेल सुरु भएको छैठौँ मिनटमै खड्काले पहिलो गोल गरेर टिमलाई अगाडि बढाएका थिए । १८ औँ मिनटमा दोस्रो गोल गर्न सफल भएका खड्काले खेलको अन्तिम ७० औँ मिनटमा तेस्रो गोलमार्फत ह्याट्रिक गरेका थिए ।
२२ औँ मिनटमा गाईघाटकै अर्का खेलाडी सरोजले तेस्रो गोल गर्दा मध्यान्तरपछि ५८ औँ मिनटमा दिवशले चौथो गोल गरेका थिए । खैजनपुरका देवराज चौधरीले ३८ औँ मिनटमा १ गोल गरे मात्र गरेर टिमलाई निल हुनबाट बचाएको छ । फाईनल खेलको म्यान अफ द म्याच २ न. खैजनपुरका देवराज चौधरी घोषित भए । उनले पुरस्कार स्वरुप १ हजार नगद र प्रमाणपत्र प्राप्त गरे ।
गाईघाटस्थित थरुहट उदयपुर रंगशालामा सम्पन्न प्रतियोगिता गत ९ गतेबाट सुरु भएको थियो । विजेता गाईघाटलाई ५० हजार नगद, ट्रफि र प्रमाणपत्र तथा उपविजेतालाई ३० हजार नगद र प्रमाणपत्र नगरप्रमुख बसन्त बस्नेतले प्रदान गरे । रंगशालामै आयोजित समापन समारोहमा मेयर बस्नेतले विजेता र उपविजेता टिमका खेलाडीहरुलाई नगद, ट्रफि र प्रमाणपत्र प्रदान गरेका हुन् ।
प्रतियोगितामा विधागततर्फ सर्वोत्कृष्ट खेलाडीको उपाधि गाईघाटका आयुव राईले पाए । बेस्ट किपरको उपाधि ११ कै सन्दिप राई भए भने ११ कै प्रमिल श्रेष्ठ बेस्ट डिफेन्स भए । हाई स्कोरको उपाधि ११ कै सुनिल खड्काले पाउँदा २ नं. का देवराज चौधरीले बेस्ट डिफेन्सको उपाधि पाए । गाईघाटकै अरुण राई बेस्ट कोचको उपाधिबाट पुरस्कृत भए । विधागत खेलाडीलाई सर्वोत्कृष्ट खेलाडीलाई ३ हजार र अन्य विधागतत उपाधि विजेता खेलाडीहरुलाई जनही २ हजारका दरले पुरस्कार प्रदान गरियो ।
त्रियुगाका संस्थापक नगरप्रमुख स्वर्गीय लालशेर राईको २३ औँ स्मृति दिवसको अवसर पारेर प्रतियोगिता आयोजना गरिएको हो । त्रियुगा नगर खेलकुद विकास समितिको संयोजन, नगरपालिकाको प्रायोजन र एन्फा उदयपुरको आयोजनामा सम्पन्न प्रतियोगितामा त्रियुगाका १६ मध्ये १४ वटा वडाका खेलाडी समूहको सहभागिता रहेको आयोजक एन्फा उदयपुरका अध्यक्ष रञ्जन कार्कीले बताए ।
