१
२0८0 असार १४ बिहीबार
उदयपुर, असार १३
उदयपुरको कटारी नगरपालिकाले आगामी आर्थिक वर्ष ०८०÷८१ का लागि झण्डै ८४ करोड रुपैँयाको अनुमानित बजेट पारित गरेको छ । गत १० गते ‘११ औँ नगरसभा’मा प्रस्तुत ८३ करोड ८६ लाख ६८ हजार ५ सय रुपैँयाको अनुमानित वार्षिक आयव्यय २ दिनसम्म छलफल र बहस गर्दै नगरसभाले पारित गरेको हो ।
‘सुन्दर कटारी नगरको पहिचान, सुशासन र समृद्धि हाम्रो पहिचान’ भन्ने नाराका साथ आफ्नै सभाकक्षमा आयोजित नगरसभा अधिवेशनमा उपप्रमुख गीता खड्काले प्रस्तुत गरेको नीति तथा कार्यक्रम र बजेटबारे नगरसभा सदस्यहरुले व्यापक छलफल र वहस गर्दै पारित गरेको प्रमुख प्रशासकीय अधिकृत अनिल किरातीले बताए । उनका अन्ुसार अनुमानित बजेटमा आगामी वर्ष नगरपालिकाले आन्तरिक आय ५ करोड ५५ लाख १८ हजार ५ सय गर्ने प्रक्षेपण गरिएको छ भने स्थानीय राजश्ववापत १ करोड ८७ लाख रुपैँया संकलन हुने अपेक्षा गरिएको छ ।
नगरसभाले संघीय सरकारबाट वित्तीय समानीकरण अनुदान १० करोड ९७ लाख, सशर्त ४२ करोड ७४ लाख, राजश्व बाँडफाँड १५ करोड ६० लाख प्रापत हुने प्रक्षेपण गर्दा संघबाटै आउने समपुरक अनुदान १ करोड ७५ लाख र विशेष अनुदान ७६ लाख आमदानी हुने बिवरण बजेटमा उल्लेख छ । त्यसैगरी प्रदेशतर्फको अनुदान समानीकरण ६६ लाख ३४ हजार, सशर्त ५२ लाख ६१ हजार, समपुरक १ करोड ३० लाख र प्रदेश राजश्व बाँडफाँड २ करोड १३ लाख ७६ हजार प्राप्त हुने प्रक्षेपण बजेटमा गरिएको छ ।
कटारीलाई संघ र प्रदेश सरकारले ४३ करोड २५ लाख ६१ हजार रुपैँया अनुदान दिने गरी तोकेको सिलिङभित्र रहेर बजेट विनियोजन गरेको छ भने ४० करोड ६१ लाख १७ हजार ५ सय विषयगत समितितर्फ छुट्याएको छ । विषयगत समितितर्फ नगरसभाले सबभन्दा बढी बजेट सुशासन तथा संस्थागत विकासतर्फ छुट्याएको छ भने सबभन्दा थोरै वन, वातावरण र विपत व्यवस्थापनतर्फ विनियोजन गरेको छ । सुशासन तथा संस्थागत विकासका लागि २६ करोड १९ लाख ६७ हजार ५ सय छु्ट्याएको नगरसभाले वन, वातावरण र विपत व्यवस्थापन समितिलाई ६४ लाख विनियोजन गरेको छ । त्यसैगरी आर्थिक समितिलाई १ करोड ४२ लाख, सामाजिक विकास समितिलाई ४ करोड ८७ लाख ५० हजार र भौतिक पूर्वाधार समितिलाई ७ करोड ४८ लाख विनियोजन गरेको छ ।
उपप्रमुख खड्काले बजेटसँगै प्रस्तुत गरेको नगरपालिकाका ५ क्षेत्र र १५ उपक्षेत्रभित्र समेटिएका विभिन्न १ सय वटा नीति तथा कार्यक्रम पनि नगरसभाले पारित गरेको छ । नीति कार्यक्रम र बजेट प्रस्तुत गर्ने सिलसिलामा चालु आर्थिकवर्षको जेठ मसान्तसम्मको खर्च विवरणको यथार्थ समीक्षा पनि उपमेयर खड्काले गरेकी छिन् । जस अनुसार चालु वर्ष ३ करोड ८३ लाख ६० हजार आन्तरिक आमदानी गर्ने प्रक्षेपण गरिएकोमा जेठ मसान्तसम्म २ करोड ६८ लाख ३२ हजार ५ सय ५६ रुपैँया संकलन भईसकेको छ । नगरको गतवर्षको अल्या पनि ४ करोड ४१ लाख २० हजार ८ सय २८ रुपैँया रहेको समीक्षा पनि उनले गरेकी छिन् ।
नगरपालिकाले गत जेठसम्म ५४ करोड २९ लाख २ हजार ३ सय ५१ खर्च गरिसकेको यथार्थ चित्रण उल्लेख रहेको समीक्षा बिवरण अनुसार आन्तरिक स्रोत ३ करोड ७० लाख ९४ हजार ७ सय ८ रुपैँया २३ पैसा खर्च भएको छ । संघीय सशर्त अनुदान ३० करोड ६ लाख ८ हजार १ सय १७ खर्च हुँदा समानीकरण ८ करोड ७६ लाख ७५ हजार २ सय ९९ रुपैँया खर्च भएको छ । त्यस्तै, राजश्व बाँडफाँड ९ करोड ३४ लाख २० हजार ९ सय ७७ र समपुरक अनुदान ७२ लाख ८ हजार ३ सय ८८ रुपैँया खर्च भईसकेको छ । प्रदेशतर्फको अनुदान रकम सशर्त २२ लाख ९३ हजार १ सय ९१, समानीकरण ४० लाख २७ हजार ५ सय ८४, राजश्व बाँडफाँड ८३ लाख १४ हजार ८ सय ९५, समपुरक २१ लाख ९ हजार १ सय ९१ खर्च भएको समीक्षा बिवरणमा उल्लेख छ ।
प्रमुख प्रशासकीय अधिकृत किरातीको सञ्चालनमा सम्पन्न नगरसभामा ५ वटै विषयत समितिका संयोजकहरुले आआफ्नो विषयगत समितिको वार्षिक प्रगति प्रतिबेदन प्रस्तुत गरेका थिए । नगरसभा अध्यक्ष नगरप्रमुख राजेशचन्द्र श्रेष्ठले नगरसभामा प्रस्तुत नीति तथा कार्यक्रम र बजेट तमाम कटारी नगरबासीको हकहित र विकास सहभागितामा केन्द्रित भएर जनप्रतिनिधि र कर्मचारी समूहले मेहनेतका साथ बनाएको बताए । विगत वर्षहरुको अनुभव, बर्तमानको आवश्यक्ता र भविष्यको समग्र विकास खाकालाई मध्येनजर गर्दै निर्माण गरेको बजेट तथा नीति कार्यक्रमलाई थप छलफल, सुझाव र सल्लाहका साथ पारित गरिदिएकोमा सम्पूर्ण नगरसभा सदस्य, विषयगत समिति, शाखा प्रमुख कर्मचारीप्रति मेयर श्रेष्ठले आभार व्यक्त गरेका थिए ।
