शिक्षक संघ अध्यक्षमा राउत, संस्थापनपक्ष बहुमतमा 

१

उदयपुर, जेठ २९

नेपाली काँग्रेसनिकट शिक्षक संघ उदयपुरको ‘नवौँ अधिवेशन’ले चुनावी प्रक्रियामार्फत कार्यसमिति चयन गरेको छ । संस्थापन र इतरबीच बिबादले सुरु भएको ३ महिनापछि सम्पन्न भएको अधिवेशनले रामबहादुर राउतको अध्यक्षतामा १७ सदस्यीय कार्यसमिति चयन गरेको छ । 

शनिबार सम्पन्न मतदान परिणाम सोमबार सार्वजनिक भए अनुसार अधिवेशनमा राउत ४ सय ६७ मत पाएर अध्यक्ष विजयी भएका छन् । उनका प्रतिद्वन्द्वी बाबुराम कार्कीले ४ सय ८ मत पाएका छन् । उनी यसअघिका अध्यक्षसमेत हुन् । महिला उपाध्यक्षमा हीराकुमारी चौधरी ४ सय ८० मत पाएर जितिन् भने अर्का उपाध्यक्षमा भोगनारायण यादव  प्रतिस्पर्धी बमेन्द्र बुर्जाभन्दा २ मत बढी ४ सय ९ मत ल्याएर जितेका छन् । बुर्जालाई ४ सय ७ मत मात्र पाए । महिला उपाध्यक्षमा पराजित कमला सुबेदीलाई ३ सय ९१ मत परेको छ । 

सचिवमा रामप्रसाद ढुंगाना ५ सय ३७ मत पाएर विजयी भएका छन् भने उनका प्रतिद्वन्द्वी केवलविक्रम सिंह ठकुरीले ३ सय ४२ मत पाए । अर्थ सचिवमा कर्णबहादुर मगर सर्वाधिक ५ सय ९७ मत पाएर विजयी भएका छन् भने उनका प्रतिस्पर्धी मिथिलेश्वरी खतिवडाले ३ सय ६८ मत पाएकी छिन् । 

खुल्ला सहसचिवतर्फ ५ सय ३५ मत पाएर उमेश घिमिरेले बाजी मारेका छन् भने  मेघनाथ लुईटेललाई २ सय ९९ मत परेको छ । त्यसैगरी महिला सहसचिवमा ५ सय १० मत पाउँदै रत्ना तामाङ विजयी हुँदा रीता परियारले ३ सय ७६ मत पाएकी छिन् । अर्थ सहसचिवमा ४ सय ९३ मत पाएर प्रतिमा गिरी, समावेशी २ जना सहसचिवमा क्रमशः गोपाल श्रेष्ठ र जसिनारायण चौधरी विजयी भएको मतदान अधिकृत नवीन राईले बताए । राईका अनुसार उनीहरुले क्रमशः ५ सय ४३ र ५ सय ९४ मत पाएका छन् । 

कार्य समिति सदस्यमा जित्ने ७ जनामा खुल्लातर्फ जितबहादुर बस्नेत, देवीचरण भट्टराई, नारायणसिंह ठकुरी र राजकुमार चोधरी छन् । त्यसैगरी महिला सदस्य जित्नेहरु आशा खाँ चौधरी, इश्वरी कार्की र रमिता श्रेष्ठ रहेको राईले बताए । 

अधिवेशनले संघीय महाधिवेशन प्रतिनिधितर्फ सरिता खड्का, रितबहादुर पुलामी मगर, लक्ष्मीप्रसाद कट्टेल र पार्वतीकुमारी राउत निर्विरोध निर्वाचित भएका छन् । 

गएको फागुन २७ गते हुने तय भएको अधिवेशनमा नेतृत्व चयन प्रक्रियामा संस्थापन पक्षको हस्तक्षेप भएको भन्दै तालाबन्दी गरेर रोकिएको अधिवेशन ३ महिनापछि सौहाद्र्रपूर्ण रुपमा सम्पन्न भएको निर्वाचन पार्टीले जनाएको छ । जिल्लाभरका १ हजार १ सय ९६ शिक्षक मतदाता रहेको अधिवेशनमा ८१.५५ प्रतिशत अर्थात ९ सय ७८ मत खसेको समितिले जनाएको छ । 

केन्द्रमा सभापति शेरवहादुर र केन्द्रीय सदस्यद्वय कृष्ण सिटौला तथा शेखर कोईरालापक्षको गुट रहेको काँग्रेसको जिल्लामा सभापति हिमाल कार्की र पूर्व सभापति बिदुर बस्नेतबीच प्रष्ट खेमा रहेको छ । यो अधिवेशनले चयन गरेको १० सदस्यीय पदाधिकारीमध्ये अध्यक्ष र महिला उपाध्यक्ष (२ जना) र सदस्यतर्फ खुल्ला २ र महिला १ (३ जना)बाहेक सबै संस्थापनपक्षको कब्जामा परेको छ ।