१
२0८0 बैशाख २१ बिहीबार
उदयपुर, वैशाख २१
सदरमुकाम गाईघाटमा भईरहेको ‘प्रथम त्रियुगा उपमेयर गोल्डकप महिला फुटबल प्रतियोगिता ०८०’को फाईनलमा मोरङ र झापाको प्रतिस्पर्धा हुने भएको छ । बिहीबार सम्पन्न अन्तिम सेमिफाईनलमा मोरङको पथरी शनिश्चरे महिला फुटबल क्लब (पिएसडब्लु) विजयी हुँदै फाईनलमा पुगेको छ भने अघिल्लो दिनकैे खेलमा झापाले सुनसरीलाई हराएर फाईनलको यात्रा तय गसिकेको छ ।
बिहीबारको खेलमा पिएसडब्लु क्लब मोरङले नमोबुद्ध युथ क्लब सप्तरीलाई १–० गोल अन्तरले पराजित गर्दै उापधिको दावेदार बन्न पुगेको हो । खेल सुरु भएको ३२ औँ मिनटमा सुप्रिया मियाले गरेको १ गोल नै मोरङलाई फाईनल पुग्न पर्याप्त आधार बन्यो ।
८० मिनटको खेल अवधिमा सप्तरीले धेरै पटकको प्रयासमा पनि जवाफी गोल गर्न नसकेपछि मियाकै गोल निर्णायक बन्न पुगेको हो । खेलको म्यान अफ द म्याचको उपाधि पनि उनै मिया घोषित भईन् । उनलाई त्रियुगा नगर उपप्रमुख महेश्वरी राईले नगद २ हजार र ट्रफि प्रदान गरिन् ।
गाईघाटस्थित थरुहट उदयपुृर रंगशालामा भईरहेको खेलको फाईनल प्रतिस्पर्धा आउँदो शनिबार हुदैछ । आयोजक अखिल नेपाल फुटबल संघ (एन्फा) उदयपुरका अनुसार फाईनलमा झापा र मोरङबीच १ लाख नगद र ट्रफिका लागि शनिबार दिउँसो ३ः०० बजे प्रतिस्पर्धा गर्नेछन् । प्रतियोगिताको उपविजेताले ५० हजार नगद र प्रमाणपत्र प्राप्त गर्नेछ भने बिधागत पुरस्कारतर्फ उत्कृष्ट खेलाडीलाई ५ हजार नगदसहित सिल्ड र प्रमाणपत्र तथा अन्य पुरस्कृतलाई जनही ३ हजार नगद पुरस्कार प्रदान गरिने एन्फाका अध्यक्ष रञ्जन कार्कीले बताए ।
त्रियुगा नगरपालिकाको ‘जनतासँग उपमेयर कार्यक्रम’ अन्तर्गत नगर युवा तथा खेलकुद विकास समितिको समन्वयमा प्रतियोगिता आयोजना गरिएको नगर खेलकुद विकास समितिका अध्यक्ष विजयकुमार सिंहले बताए ।
