१
२0८0 बैशाख १८ सोमबार
उदयपुर वैशाख १८
सदरमुकाम गाईघाटमा शनिबारदेखि जारी ‘प्रथम त्रियुगा उपमेयर गोल्डकप महिला फुटबल प्रतियोगिता ं८०’को तेस्रो दिन झापाको अल ईन वान क्लब विजयी भएको छ । सोमबार दिउँसो सम्पन्न खेलमा सुनसरीको धरानलाई २–१ गोलको अन्तरले पराजित गर्दै झापा सेमिफाईनलमा पुगेको हो ।
गाईघाटस्थित थरुहट उदयपुर रंगशालामा भईरहेको प्रतियोगितामा झापाको तर्फबाट २ गोल हुँदा धरानले १ गोल मात्र फर्काउन सफल भयो । यसअघि माउण्ट एभरेष्ट स्पोर्टिङ क्लब सुनसरी र नमोबुद्ध यवा क्लब सप्तरी सेमिफाईनलमा प्रवेश गरिसकेका छन् । शनिबार भएको उद्घाटन खेलमा बागमति क्लब सर्लाहीलाई टाईब्रेकरमा ३–१ गोलले पराजित गर्दै सुनसरी र दोस्रो दिन आईतबार हेटौँडा फुटबल एकेडेमी मकवानपुरलाई पराजित गर्दै सप्तरीले सेमिफाईनलको यात्रा तय गरेका हुन् ।
त्रियुगा नगरपालिका ‘जनतासँग उपमेयर कार्यक्रम’ अन्तर्गत आयोजित प्रतियोगिता नगर युवा तथा खेलकुद विकास समितिको समन्वय र अखिल नेपाल फुपटबल संघ (एन्फा) उदयपुरको आयोजनामा भईरहेको छ । प्रथम पुरस्कार ट्रफिसहित १ लाख नगद रहेको प्रतियोगिताको उपविजेताले ५० हजार नगदसहित मेडल र प्रमाणपत्र पाउनेछ । त्यस्तै विधागततर्फ बिभिन्न पुरस्कारहरु पनि बितरण गरिने आयोजक एन्फा उदयपुरका अध्यक्ष रञ्जन कार्कीले बताएका छन् ।
मंगलबार हुने अन्तिम क्वाटरफाईनल खेलमा मोरङको पिएसडब्लुसी पथरीसँग घरेलु टिम गाईघाटले प्रतिस्पर्धा गर्नेछ । २० र २१ गते सेमिफाईनलमा प्रतिस्पर्धा हुने प्रतियोगिताको फाईनल भिडन्त आउँदो २३ गते हुने नगर खेलकुद विकास समितिका अध्यक्ष विजयकुमार सिंहले बताएका छन् ।
