१
२0७९ माघ १९ बिहीबार
उदयपुर, माघ १९
उदयपुृरको बिकट पहाडी गाउँपालिका लिमचुङबुङ आन्तरिक पर्यटन प्रवद्र्धनको आक्रामक लक्ष्य लिएर अघि बढन थालेको छ । पर्यटन विकासलाई समृद्धिको मुख्य आधार मानेको गाउँपालिकाले त्यसका लागि व्यवस्थित र योजनाबद्ध तरिका अपनाउने उदेश्यले बिभिन्न गतिबिधिहरु सञ्चालन गर्न थालेको छ ।
यसै सिलसिलामा गाउँपालिकाभित्रै बाक्लो संख्यामा होमस्टे सञ्चालन गर्ने योजनासहित होमस्टे सञ्चालन बिधिबारे तालिम आयोजना गरेको छ । नेपाल पर्यटन तथा होटल व्यवस्थापन प्रतिष्ठान (नाटहम) को संयोजन र गाउँपालिकाको आयोजनामा वडा नं. ३ बाराहास्थित मु्काममा बुधबारदेखि ‘होमस्टे सम्बन्धी व्यवस्थापन तालिम’ सुरु भएको छ ।
पर्यटन तथा होटल व्यवस्थापन विज्ञहरु अजय बखती, हसिन महर्जन र धर्मराज उप्रेतीले तालिममा सहजीकरण गरिरहेका छन् । गाउँपालिकाका प्रमुख प्रशासकीय अधिकृत योगेन्द्रराज गुरुङका अनुसार बखती नाटहमका तालिम संयोजक तथा प्रशिक्षकसमेत हुन् भने महर्जन र उप्रेती होटल व्यवस्थापनका ज्ञाता हुन् ।
तालिममा सहभागीहरुलाई प्रशिक्षकत्रयले होमस्टे सञ्चालन बिधि, बिभिन्न स्थानीय उत्पादनका खानेकुरा पकाउने पाक कला शिक्षा, पाहुनालाई स्वागत गर्ने तरिका र आवास व्यवस्थापन आदि विषयमा प्रशिक्षण दिनेछन् । १८ गतेदेखि सुरु तालिम आउँदो २४ गते समापन हुने अधिकृत गुरुङले बताए ।
७ दिने गृह व्यवस्थापन तालिममा २० महिला र ११ पुरुष गरी ३१ जना होमस्टे तथा पर्यटन व्यवसाय उन्मुख स्थानीयको सहभागिता रहेको छ । जस अनुसार वडा नं. ३ का १५, वडा नं. २ का १३ र बाँकी ३ जना अन्य वडाबाट सहभागिता रहेको हाकिम गुरुङले बताए । तालिम प्राप्त प्रशिक्षार्थीहरुलाई बिभिन्न ठाउँमा पर्यटकमैत्री होमस्टेहरु सञ्चालन गर्न उत्प्रेरित गर्न गाउँपालिकाले आवश्यक सहयोग र समन्य गर्ने छ ।
