त्रियुगा नगरपालिका १६ ले नयाँ भवनबाट काम थाल्यो 

१

चिलाउने, मंसिर १४

सदरमुकामको त्रियुगा नगरपालिकाका १६ नं. वडा चिलाउनेले नयाँ भवनबाट काम गर्न थालेको छ । नगरपालिका भए पनि बिकट पहाडी वडा भएकाले विकास निर्माणमा पछि रहेको चिलाउनेमा वडा भवन भर्खर निर्माण भएर सञ्चालनमा आएको हो । 

बिहीबार दिउसो नगरप्रमुख बसन्तकुमार बस्नेतले एक कार्यक्रमका बीच उद्घाटन गरेपछि भवनबाट औपचारिक रुपमा कार्यारम्भ भएको हो । साविक वडा कार्यालय परिसरमै निर्मित भवन जिल्ला समन्वय समितिको १५ लाख र बाँकी नगरपालिकाको बजेटबाट निर्माण भएको वडा सचिव महेश खनालले बताए । 

खनालले ६० लाखको प्राविधिक इस्टीमेट भए पनि ३७ लाखमा ठेकक सकार भएको भवनमा प्राविधिक मूल्याङ्कन अनुसार २९ लाख रुपैँया मात्र भुक्तानी भएको बताए । भवन गलान इन्प्राटेक सर्भेईङ एण्ड इन्जिनियरिङ कन्स्ट्रक्सन प्रालिको ठेक्कामा निर्माण सम्पन्न भएको हो । एकतले भवनमा वडाध्यक्ष कार्यकक्ष, सचिव, प्राविधिक, वडा सदस्यहरुका लागि बेग्लाबेग्लै कोठा तथा शौचालयसहित ५ कोठा रहेका छन् । 

भवन बनेपछि जनप्रतिनिधि र कर्मचारीलाई काम गर्न तथा सेवाग्राहीलाई सेवा लिन सहज भएको कार्यालयका मुखिया मिलन राईले बताए । यसअघि साविक पुरानो र साँघुरो गाविस भवनमा बसेर काम गर्नु पर्दाका समस्या नयाँ भवन बनेसँगै अन्त्य भएको राईले बताए । 

अव वडा कार्यालयलाई बैठक बस्न सभाकक्ष र कर्मचारी आवासको मात्र अभाव रहेको दलित महिला वडा सदस्य कुन्ता परियारले बताईन् । बैठककक्ष अनिवार्य चाहिने भएकाले सो भवनमा तला थप्नुपर्ने परियारले बताईन् । त्यसका लागि थप बजेट व्यवस्था गर्न उनले नगरपालिकार्लाइ आग्रह गरेकी छिन् । 

भवन उद्घाटन कार्यक्रममा बोल्दै मेयर बस्नेतले नगरपालिका भए पनि त्रियुगाका . १६ लगायत केही वडाहरु भौगोलिक रुपमा बिकट भएकाले विकास निर्माणमा पछि रहेको बताए । उनले त्यस्ता वडाहरुलाई विशेष ध्यान दिएर बजेट बिनियोजन गर्दै अघि बढिरहेको बताए । मेयर बस्नेतले १६ नं. वडाध्यक्ष मानबहादुर राई गतिसिल र सक्षम व्यक्ति भएकाले अन्य वडाको तुलनामा सो वडामा विकास निर्माणका कामहरु  धेरै भएको बताए । उनले वडा प्रशासनिक भवन पनि सबभन्दा पहिले १६ नं. मै बनेको बताए । 

मेयर बस्नेतले आउँदो २ वर्षभित्र सबै वडाहरु भवनयुक्त भईसक्ने बताए । उनले नगरबासीलाई सक्षम, सुखी र आत्मनिर्भर बनाउन आफुलगायत जनप्रतिनिधि र कर्मचारी लागिरहेको भन्दै त्यसका लागि योजनाहरु बनाइएको बताए । उनले कृषि, पशुपालन र स्थानीय उत्पादनमा लाग्न सके समृद्धि टाढा नभएको बताए । १६ नं. वडा सबभन्दा धनी रहेको बताउँदै उनले आगामी ५ सय वर्षसम्म पुग्ने परिमाणको उदयपुृर सिमेन्ट उद्योगको चुनढुंगा खानी सिँधालीमा रहेको र खोलानाला, वनजंगल र वनस्पतिले यो वडा त्रियगाको मात्र नभएर देशभरीकै धनी रहेको बताए । 

सो वडामा कृषि र पशु पालनको प्रसस्त संभावना भएकाले त्यसतर्फ कार्यक्रम गर्न भर्खरै नगरपालिकाले हेफर नेपालसँग साझेदारीमा काम गर्न सम्र्झौता गरेको बताए । वडाको विकास निर्माणका कामहरुको अनुगमन स्थानीय जनता आफैले गर्न आग्रह गर्दै मेयर बस्नेतले आफ्नो गाउँ ठाउँको काम राम्रो बनाउन जनता स्वयं सचेत हुनुपर्ने बताए । उनले ९ लाखभन्दा माथिको बजेटका योजनाको अनुगमन मात्र उपमेयरले गर्ने त्यो भन्दा मुनिको बजेटको कामको अनुगमन वडाबाटै गर्न सुझाए । 

प्रमुख प्रशासकीय अधिकृत मानबहादुर वनले सक्षम जनप्रतिनिधिका कारण १६ नं. वडा अन्यको तुलनामा अगाडि रहेको बताउँदै वडाबासीको समस्या छिटोछरितो र सहज तरिकाले गर्न वडा कर्मचारीलाई निर्देशन दिए । सकेसम्म जनतालाई सहज र सुलभ तरिकाले सेवा प्रवाह गर्ने आफ्नो उदेश्य रहेको भन्दै अधिकृत वनले वडास्तरीय योजनाको सम्झौता र भुक्तानी कानुन र प्रविधिले मिलेसम्म वडाबाटै गर्ने व्यवस्था गर्ने प्रतिबद्धता जनाए ।

काँग्रेस पूर्व जिल्ला सचिव मदनराज कटुवालले वडाको विकास गर्न सबैपक्ष मिलेर अघि बढ्नुपर्ने बताए । उनले आफु जन्मेको चिलाउने केही वर्षअघिसम्म बिकट र हिडेर आउनुपर्ने ठाउँ भएकोमा अहिले गाडी चढेर आउन पाउँदा खुसी लागेको बताए । सञ्चार, सडक, विद्युत, खानेपानी सबै सुविधा पुगिसकेको देख्दा आफु अलि अगाडि नै जन्मेजस्तो लागेको कटुवालको भनाई थियो । सक्षम जनप्रतिनिधि भएका कारण विकास निर्माणका कामहरु दु्रतगतिमा भईरहेको भए पनि वडाको थप विकास गर्न आवशयक बजेट र गाउँलेहरुमा एकता आवश्यक रहेकोमा कटुवालले जोड दिए । 

कार्यक्रममा जिल्ला समन्वय समिति सदस्य तथा १६ नं. महिला वडा सदस्य गोमा कार्कीले वडा विकासका लागि वडाध्यक्ष र सदस्यहरु सबै लागी पर्दै आएको भन्दै पछिल्लो समय धेरै विकास निर्माणका कामहरु भईरहेको बताईन् । स्वास्थ्य, खानेपानी, सडक, विद्युत, शिक्षा र सञ्चारजस्ता आधारभूत आवश्यक्ताका कुराहरु १६ नं. वडामा प्राय सबै पुरा हुँदै आएको कार्कीको भनाई थियो । 

कार्यक्रमका सभाध्यक्ष वडाध्यक्ष मानबहादुर राईले नयाँ वडा प्रशासनिक भवन बनेपछि अव वडाबासीलाई सहज तरिकाले सेवा प्रवाह गर्न सकिने बताए ।  नगरपालिका भए पनि भौगोलिक कठिनाईले विकास निर्माणमा पछि रहेकाले चुनावमा गरेको वाचार र प्रतिबद्धता अनुसार रातदिन काम गरिरहेको उनले बताए । जनताको आधारभूत आवश्यक्ताका कुराहरु विद्युत, सडक, खानेपानी र सञ्चारका कामहरु गर्ने वाचार गरे अनुसार एकपछि अको गरिरहेको वडाध्यक्ष राईको भनाई थियो । 

वडाका अधिकांश ठाउँमा विद्युत, खानेपानी र सडक पुगिसकेको तर, अव नगरपालिकासँग १२ महिनै आउजाउ गर्न मिल्ने गरी सडक कालोपत्रे बनाउन लाग्नुपर्ने बताए । त्यसका लािग उनले मेयर बस्नेत र अधिकृत वनसँग सक्दो सहयोगको अपेक्षा गरे । खानेपानी, सडक, शिक्षा र प्राथमिक स्वास्थ्य सेवा नभई नहुने भएकाले त्यसको उपभोग सबै वडाबासीलाई गराउने काम भईरहेको राईले बताए । नयाँ भवनमा तला थपेर सभाकक्ष बनाउन उनले आवश्यक बजेटको माग मेयर बस्नेत र अधिकृत वनसँग गरे । 

कार्यक्रमका काँग्रेस वडा सभापति लोकबहादुर राई, माओबादी वडाध्यक्ष उपेन्द्र रखाल, विहानी महिला समूह अध्यक्ष कुमारी राई, विद्यालयका प्रधानाध्यापकहरु, पत्रकार र स्थानीय बुद्धिजीविहरुले बोल्दै १६ नं. वडा वास्तविक नगरपालिकाजस्तो बनाउन सबभन्दा बढी सडक स्तरोन्नतिमा ध्यान दिनुपर्नेमा जोड दिएका थिए । 

फोटो फिचर