१
२0७९ मंसिर १३ मंगलवार
उदयपुर, मंसिर १३
नेपाली काँग्रेसका केन्द्रीय सदस्य डा. नारायण खड्काले उदयपुरबाट चौथो पटक संसदको यात्रा प्रारम्भ गरेका छन् । ०६४ को पहिलो संविधानसभादेखि भर्खरै सम्पन्न मंसिर ४ को चुनावसम्ममा लगातार चौथो पटक उनी विजयी भएका हुन् । ०५६ सालमा पहिलो पटक चुनावी मैदानमा उत्रिदा भने खड्का पराजय भोग्न पुगेका थिए ।
मंगलबार राति १०ः३० बजे सार्वजनिक अन्तिम परिणाम अनुसार परराष्ट्रमन्त्रीसमेत रहेका खड्काले नेकपा (एमाले) की पोलिटव्युरो सदस्य मञ्जुकुमारी चौधरीलाई २ हजार ३ सय ७९ मतको फरकले विजयी भएका हुन् ।
खड्काले ३१ हजार २ सय ७० मत प्राप्त गरे भने चौधरीले २८ हजार ८ सय ९१ मत पाईन् । प्रतिनिधिसभाको मतपेटिकामा प्रदेशसभाको १ सय थान मतपत्र भेटिएपछि आईतबार विहान १०ः०० बजेदेखि स्थगित गणना कार्य मंगलबार विहानदेखि मात्र सुचारु भएर भर्खर अन्तिम परिणाम सार्वजनिक भएको हो ।
चुनावी मैदानमा रहेका अन्य उममेदवारहरु राप्रपा, नेस्वपा र जसपाबाहेक कसैले ५ सय मत कटाउन सकेका छ्रैनन् । राप्रपाका घु्रव रायमाझीले ३ हजार ९ सय १५ मत पाउँदा नेपाल स्वतन्त्र पार्टीका उद्धव घिमिरेले ३ हजार ४ सय ४४ र जसपाका गोपाल राईले १ हजार ९ सय ६ मत पाएका छन् । यो चुनावमा बिभिन्न दल र स्वतन्त्र गरी १६ जना उम्मेदवारले प्रतिस्पर्धा गरेका थिए ।
गणना भएको ७६ हजार ४ सय ५१ मतमध्ये ४ हजार ९ सय ९६ मत बदर भएको मुख्य निर्वाचन अधिकृतको कार्यालयले जनाएको छ ।
खड्कासँग ०६४ र ०७० को संविधानसभा चुनावमा पराजित नेकपा (माओबादी केन्द्र) का राजन किराती (बासु) भने यसपटकको चुनावमा गठबन्धनबाट प्रदेश १ (क) मा विजयी भएका छन् ।
